സ്വന്തം വീട്ടില് നില്ക്കുന്നതാണ് തനിക്കും ഫഹദിനും ഏറെയിഷ്ടമെന്ന് നടി നസ്രിയ. ഷൂട്ടിംഗിനായി പോകുമ്പോള് വീട്ടില് നിന്നിറങ്ങാന് മടിയാണ്. യാത്രകള് പോയാലും നമ്മുടെ വീട്, ബാല്ക്കണി എന്ന് പറഞ്ഞിരിക്കും. വീട്ടില് തന്നെയുള്ള ദിവസം ആരോടും പറയില്ല. ഫോണ് ഓഫ് ചെയ്ത് വയ്ക്കും എന്നാണ് നസ്രിയ വനിതാ മാഗസിന് നല്കിയ അഭിമുഖത്തില് പറയുന്നത്.
വീട് എന്ന് പറഞ്ഞാല് താമസിക്കുന്ന സ്ഥലം മാത്രമല്ലല്ലോ. ഞങ്ങളുടെ സ്പേസ് എന്ന് കൂടിയാണ്. ആ സ്പേസിനോടാണ് ഞാനും ഷാനുവും അഡിക്ട് ആയിട്ടുള്ളത്. അതുകൊണ്ട് ഷൂട്ടിന് വീട്ടില് നിന്നിറങ്ങുക എന്ന് പറയുന്നത് ബുദ്ധിമുട്ടുള്ള കാര്യമാണ്. ബാല്ക്കണിയും അവിടെ നിന്നു നോക്കുമ്പോഴുള്ള ആകാശവുമൊക്കെ പത്ത് വര്ഷമായി പ്രിയപ്പെട്ടതാണ്.
യാത്രകള് പോയാലും കുറച്ചു ദിവസം കഴിഞ്ഞാല് നമ്മുടെ ബാല്ക്കണി, നമ്മുടെ വീട് എന്നൊക്കെ പറഞ്ഞ് കൊതിച്ചിരിക്കാറുണ്ട്. ഇതുപോലെയുള്ള ചില കിറുക്കുകള് വേറെയുമുണ്ട്. യാത്രകള് പോകുമ്പോള് ഏത് സ്ഥലത്ത് എപ്പോള് പോയി ഇറങ്ങണം എന്ന് മാത്രമേ തീരുമാനിക്കുകയുള്ളൂ.
ചെന്നിറങ്ങി കഴിഞ്ഞാല് പിന്നെ, എങ്ങോട്ട് പോകണമെന്നതിന് ഒരു പ്ലാനും ഉണ്ടാവില്ല. രാവിലെ പോവാന് തോന്നിയില്ലെങ്കില് റൂമില് തന്നെ കിടക്കും. ഷൂട്ടിങ് എന്നും പ്ലാനിംഗിന് അനുസരിച്ചല്ലേ മുന്നോട്ടു പോവുന്നത്. അപ്പോള് യാത്രയും കൂടി പ്ലാന് ചെയ്താല് അത് ബോറാകും. ചിലപ്പോള് ഞങ്ങള് വീട്ടിലുണ്ടെന്ന് ആരോടും പറയില്ല.
രണ്ട്-മൂന്ന് ദിവസം ഞങ്ങള് മാത്രമായി വീട്ടില് തന്നെയിരിക്കും. ഫോണും ഓഫ് ചെയ്ത് വയ്ക്കും. ഇതൊക്കെ ജീവിതത്തിലെ ഹാപ്പിനസ് ആണ് എന്നാണ് നസ്രിയ പറയുന്നത്. അതേസമയം, സൂക്ഷ്മദര്ശിനി എന്ന ചിത്രമാണ് നസ്രിയയുടെതായി റിലീസ് ചെയ്തിരിക്കുന്നത്. പുഷ്പ 2 ആണ് ഫഹദിന്റെതായി ഇനി റിലീസിന് ഒരുങ്ങുന്നത്.