കഴിഞ്ഞ വര്ഷത്തെ സൂപ്പര്ഹിറ്റ് ചിത്രങ്ങളില് ഒന്നാണ് “അയ്യപ്പനും കോശിയും”. പൃഥ്വിരാജിനെയും ബിജു മേനോനെയും കേന്ദ്ര കഥാപാത്രങ്ങളാക്കി സച്ചി രചനയും സംവിധാനവും നിര്വഹിച്ച ചിത്രത്തിലെ പാട്ടുകളും ഏറെ ശ്രദ്ധേയമായിരുന്നു. അട്ടപ്പാടി സ്വദേശിയായ നഞ്ചിയമ്മ പാടിയ “”കലക്കാത്ത”” എന്ന ഗാനം പ്രേക്ഷക ഹൃദയങ്ങള് കീഴടക്കി.
അയ്യപ്പനും കോശിക്കും ശേഷം ഇപ്പോള് അഭിനയിക്കാന് പോവുന്നതിന് മുമ്പ് ഇത്ര പൈസ വേണമെന്ന് പറയും എന്ന് തുറന്നു പറയുകയാണ് നഞ്ചിയമ്മ. അയ്യപ്പനും കോശിയിലും അഭിനയിച്ചതിന് 50000 രൂപ കിട്ടി. ഇപ്പോള് ഓരോ പരിപാടിക്കൊക്കെ വിളിച്ചാല് ആയിരമോ രണ്ടായിരമോ കിട്ടുമെന്നും നഞ്ചിയമ്മ ഗൃഹലക്ഷമിക്ക് നല്കിയ അഭിമുഖത്തില് പറഞ്ഞു.
തന്റെ പണിയൊക്കെ വിട്ട് പശുവിനെയും ആടിനെയുമൊക്കെ മറന്ന് വേണം അഭിനയിക്കാന് പോവാന്. ഇപ്പോള് പരിപാടിക്ക് പോവുമ്പോള് കിട്ടുന്ന തുക ചെലവിനെടുക്കും. ആ കിട്ടുന്ന പൈസ അനുസരിച്ച് സാധനങ്ങള് വാങ്ങും. അരി ഗവണ്മെന്റ് തരും. എന്നാലും ബാക്കി സാധനങ്ങള് വാങ്ങണ്ടേ.
പണ്ട് തൊഴിലുറപ്പ് പണിയ്ക്ക് പോവുമായിരുന്നു. എന്നാല് സിനിമയില് വന്നതുകൊണ്ട് അവരെന്നെ ഇപ്പോള് ജോലിക്ക് എടുക്കില്ല. “നീ പണിയെടുത്താല് ഞങ്ങളെ പഞ്ചായത്തിലൊക്കെ ചീത്ത പറയും” എന്ന് അവര് പറയും. അങ്ങനെ ആ പണി പോയി. പിന്നെ കണക്കു പറഞ്ഞ് പൈസ വാങ്ങിയില്ലെങ്കില് എങ്ങനെ ജീവിക്കും എന്ന് നഞ്ചിയമ്മ പറയുന്നു.