തെലുങ്ക് സിനിമയിലെ അതുല്യ പ്രതിഭകളില് ഒരാളായിരുന്നു അക്കിനേനി നാഗേശ്വര റാവു. എഎന്ആര് എന്നറിയപ്പെടുന്ന താരത്തെ കുറിച്ച് മകനും നടനുമായ നാഗാര്ജുന പറഞ്ഞ വാക്കുകളാണ് ഇപ്പോള് ശ്രദ്ധ നേടുന്നത്. സ്ത്രൈണതയുടെ പേരില് കടുത്ത പരിഹാസം നേരിട്ട എഎന്ആര് ആത്മഹത്യ ശ്രമിച്ചിരുന്നു എന്നാണ് നാഗാര്ജുന പറയുന്നത്.
ഇന്റര്നാഷണല് ഫിലിം ഫെസ്റ്റിവല് ഓഫ് ഇന്ത്യയിലെ സംവാദത്തിനിടയിലാണ് നാഗാര്ജുന സംസാരിച്ചത്. കര്ഷക കുടുംബത്തിലാണ് അച്ഛന് ജനിച്ചത്. പെണ്കുട്ടി വേണം എന്ന് ആഗ്രഹിച്ച മുത്തശ്ശി അച്ഛനെ പെണ്കുഞ്ഞിനെ പോലെയാണ് ഒരുക്കിയത്. സ്ത്രൈണതയുടെ പേരില് കടുത്ത പരിഹാസമാണ് അച്ഛന് നേരിട്ടത്.
അക്കാലത്ത് സ്ത്രീകള്ക്ക് നാടകത്തില് അഭിനയിക്കാന് വിലക്കുണ്ടായിരുന്നു. 15-ാമത്തെ വയസിലാണ് അച്ഛന് സ്ത്രീ വേഷം ചെയ്യാന് തുടങ്ങിയത്. പിന്നീട് അച്ഛന് സ്ഥിരം നായികയായി മാറി. ഇതോടെ അച്ഛന്റെ രൂപഭാവങ്ങളില് സ്ത്രീയുടെ സ്വാധീനം കൂടുതല് പ്രകടമായി.
പിന്നീട് അതിന്റെ പേരില് കടുത്ത പരിഹാസമാണ് അദ്ദേഹം നേരിട്ടത്. നിരാശനായ അദ്ദേഹം മറീന ബീച്ചിലെ കടലില് ചാടി. മരണം സ്വയം തിരഞ്ഞെടുക്കുന്നത് തെറ്റാണെന്ന് തോന്നിയ അച്ഛന് നീന്തി രക്ഷപ്പെടുകയായിരുന്നു. പീന്നീട് അച്ഛന്റെ ജീവിതം മാറ്റിമറിച്ചതും ഇതേ രൂപമാണ്.
ഒരിക്കല് റെയില്വേ സ്റ്റേഷനില് ഇരിക്കുമ്പോള് പ്രശസ്ത നിര്മ്മാതാവ് ഘണ്ടശാല ബലരാമയ്യ അച്ഛനെ കണ്ടു. അച്ഛന്റെ നടത്തം കണ്ട അദ്ദേഹം അച്ഛനോട് അഭിനയിക്കാന് താല്പ്പര്യമുണ്ടോയെന്ന് ചോദിച്ചു. അച്ഛന്റെ കണ്ണും മൂക്കും കാണാന് നല്ല ഭംഗിയുണ്ടെന്നും പറഞ്ഞു. പിന്നീട് അച്ഛന്റെ വളര്ച്ച ലോകം കണ്ടതാണ് എന്നാണ് നാഗാര്ജുന പറയുന്നത്.