‘ഓ മൈ ഡാര്ലിംഗ്’ എന്ന സിനിമയ്ക്കെതിരായ റിവ്യൂകളില് പ്രതികരിച്ച് നടന് മുകേഷ്. ഒരുപാട് പേരുടെ കൂട്ടായ പ്രവര്ത്തനവും അവരുടെ ജീവന മാര്ഗവുമാണ് സിനിമ. അതിനെ ഇല്ലാതാക്കാനുള്ള ശ്രമമാണ് ഇത്തരക്കാര് നടത്തുന്നത് എന്നാണ് മുകേഷ് പറയുന്നത്.
കൊച്ചുകുട്ടികള് വന്ന് എല്ലാവരെയും പരിഹസിക്കുകയാണ്. അഭിനയത്തിന്റെ കാര്യത്തിലും കഥയുടെ കാര്യത്തിലും കഥാപാത്രത്തിന്റെ കാര്യത്തിലുമൊക്കെ പരിഹസിക്കുമ്പോള് നമ്മള് സംശയിക്കണം. ഇവര്ക്ക് കിട്ടാനുള്ളത് എന്തോ കിട്ടിയില്ല.
മോശം പറയുന്നതിന്റെ കൂടെ നല്ല കഥാ സന്ദര്ഭങ്ങള്, നല്ല രീതിയില് ഉള്ള സീനുകള് കൂടി പറയണം. എന്നാല് ഞാന് സമ്മതിക്കാം. ഇതിപ്പോള് എങ്ങും തൊടാതെ ‘ഇവന് ഇനി സിനിമയില് ഉണ്ടാകരുത്’ എന്ന് പറയുകയാണ്. ‘ഷോലെ’ ഒക്കെ രക്ഷപ്പെട്ടത് മഹാ ഭാഗ്യം.
ഇവരൊക്കെ ഉണ്ടായിരുന്നെങ്കില് അമിതാഭ് ബച്ചന്, ധര്മേന്ദ്ര ഒക്കെ എന്താണ് ചെയ്യുന്നത്. ഇവരുടെ മുഖത്ത് എന്താണ് വരുന്നത് എന്നൊക്കെ ചോദിച്ചേനെ. അവരൊക്കെ അന്ന് രക്ഷപ്പെട്ടത് മഹാഭാഗ്യം എന്നാണ് റേഡിയോ കേരളത്തിന് നല്കിയ അഭിമുഖത്തില് മുകേഷ് പറയുന്നത്.
ഫെബ്രുവരി 24നാണ് ഓ മൈ ഡാര്ലിംഗ് തിയേറ്ററുകളില് എത്തിയത്. അനിഖ സുരേന്ദ്രന് നായികയായ ചിത്രമാണിത്. മെല്വിന് ബാബു ആണ് ചിത്രത്തില് നായകനായത്. നവാഗത സംവിധായകന് ആല്ഫ്രഡ് ഡി. സാമുവല് ആണ് ചിത്രം സംവിധാനം ചെയ്തത്.