താന്‍ ദുല്‍ഖര്‍ സല്‍മാന്‍ ഫാന്‍സ് ക്ലബ്ബിന്റെ പ്രസിഡന്റ് ആണെന്ന് മൃണാള്‍ ഠാക്കൂര്‍. ദുല്‍ഖറിന്റെ സൂപ്പര്‍ ഹിറ്റ് ചിത്രം ‘സീതാരമ’ത്തില്‍ മൃണാള്‍ ആണ് നായികയായത്. മൃണാളിന്റെ കരിയര്‍ ബ്രേക്ക് ചിത്രമാണ് സീതാരാമം. തന്റെ ആദ്യ തെലുങ്ക് ചിത്രത്തിലെ നായകനായ ദുല്‍ഖറിനോട് സ്‌നേഹവും ആരാധനയും ഉണ്ടെന്ന് മൃണാള്‍ പല അഭിമുഖങ്ങളിലും വ്യക്തമാക്കിയിട്ടുണ്ട്.
നിരവധി നായകന്മാര്ക്കൊപ്പം അഭിനയിച്ചിട്ടുണ്ടെങ്കിലും തന്റെ ഇഷ്ടതാരം ദുല്‍ഖര്‍ ആണെന്ന് മൃണാള്‍ വീണ്ടും വ്യക്തമാക്കുകയാണ്. ”ഞാന്‍ ദുല്‍ഖര്‍ ഫാന്‍ ക്ലബ്ബിന്റെ പ്രസിഡന്റാണെന്ന് പറയാന്‍ എനിക്കു യാതൊരു പേടിയുമില്ല. നിരവധി നായകന്മാര്ക്കൊപ്പം അഭിനയിച്ചിട്ടുണ്ടെങ്കിലും, ഏറ്റവും ഇഷ്ടപ്പെട്ട താരം ദുല്‍ഖര്‍ സല്‍മാനാണ്.”
”സീതാരാമം എന്നെ സംബന്ധിച്ചിടത്തോളം കഠിനമായ ചിത്രമായിരുന്നു. ഷൂട്ടിംഗിനിടയില്‍ എന്നെ പ്രോത്സാഹിപ്പിച്ചത് ദുല്‍ഖര്‍ ആണ്. അദ്ദേഹം പല ഭാഷകളിലും അഭിനയിച്ചിട്ടുണ്ട്, അതുകൊണ്ടാണ് അദ്ദേഹം എനിക്ക് പ്രചോദനമായി. ദുല്‍ഖര്‍ എന്റെ വഴികാട്ടിയും സുഹൃത്തും പ്രിയപ്പെട്ട നടനുമാണ്” എന്നാണ് മൃണാള്‍ പറയുന്നത്.
അതേസമയം, ‘ഫാമിലി സ്റ്റാര്‍’ എന്ന ചിത്രമാണ് മൃണാലിന്റെതായി ഇന്ന് തിയേറ്ററില്‍ എത്തിയിരിക്കുന്ന ചിത്രം. വിജയ് ദേവരകൊണ്ട നായകനാകുന്ന ചിത്രം പരശുറാം ആണ് സംവിധാനം ചെയ്തത്. മികച്ച പ്രതികരണങ്ങളാണ് ചിത്രത്തിന് ലഭിച്ചു കൊണ്ടിരിക്കുന്നത്.