ഷമ്മി തിലകനെതിരെയുള്ള നടപടികളില്‍ അന്തിമ തീരുമാനം എടുക്കുക അടുത്ത എക്‌സിക്യൂട്ടീവ് യോഗത്തിന് ശേഷം മാത്രമെന്ന് ‘അമ്മ’ സംഘടന. ഗണേഷ് കുമാറിനുള്ള മറുപടി രേഖാമൂലം നല്‍കുമെന്നും എക്‌സിക്യൂട്ടീവ് അംഗം ബാബുരാജ് അറിയിച്ചു. യോഗത്തിന് ശേഷമാണ് ഗണേഷ് കുമാര്‍ നല്‍കിയ കത്തിന് രേഖാമൂലമുള്ള മറുപടി നല്‍കാന്‍ തീരുമാനമായത്.
എല്ലാ വിഷയങ്ങളിലും ഇതോടെ തീരുമാനമായെന്ന് ‘അമ്മ’ പ്രസിഡന്റ് മോഹന്‍ലാല്‍ വ്യക്തമാക്കി. യോഗത്തിലെ തീരുമാനങ്ങള്‍ വാര്‍ത്താക്കുറിപ്പിലൂടെ അറിയിക്കുമെന്ന് മോഹന്‍ലാല്‍ അറിയിച്ചു. ഗണേഷ് കുമാറിനുള്ള മറുപടി മോഹന്‍ലാല്‍ ഇന്ന് നല്‍കും. അതിന് ശേഷമായിരിക്കും വാര്‍ത്താക്കുറിപ്പ് പുറത്തുവിടുക.
വിജയ് ബാബു യോഗത്തില്‍ പങ്കെടുത്ത സംഭവം, ഇടവേള ബാബുവിന്റെ ‘ക്ലബ്’ പരാമര്‍ശം, തുടര്‍ന്നുണ്ടായ വിവാദം, ‘അമ്മ’യില്‍ വര്‍ധിപ്പിച്ച അംഗത്വ ഫീസ് തുടങ്ങിയ വിഷയങ്ങള്‍ ചൂണ്ടിക്കാട്ടിക്കൊണ്ടാണ് കത്ത് നല്‍കിയത്. താന്‍ മുന്‍പ് അയച്ചിരുന്ന കത്തുകള്‍ക്കൊന്നും തന്നെ മറുപടി ലഭിച്ചിരുന്നില്ല എന്നും അതുപോലെ ആവില്ല ഈ കത്ത് എന്നും ഗണേഷ് കുമാര്‍ പരാമര്‍ശിച്ചിരുന്നു.
ഗണേഷ് കുമാറിന്റെ കത്തുമായാണ് മോഹന്‍ലാല്‍ യോഗത്തിലേക്ക് എത്തിയത്. ഷമ്മി തിലകന്‍ ഒരു അവസരം കൂടി ആവശ്യപ്പെട്ട് അമ്മയ്ക്ക് കത്ത് നല്‍കിയ പശ്ചാത്തലത്തിലാണ് തീരുമാനം അടുത്ത യോഗത്തിലേക്ക് മാറ്റിയത്.