കോഴിക്കോട് ഫാറൂഖ് കോളേജ് ഫിലിം ക്ലബ്ബ് പരിപാടിയുമായി ബന്ധപ്പെട്ട് ജിയോ ബേബിയെ ഒഴിവാക്കിയ സംഭവത്തിൽ സംവിധായകന് പിന്തുണയുമായി ഉന്നത വിദ്യാഭാസ മന്ത്രി ആർ. ബിന്ദു രംഗത്ത്.
ജിയോ ബേബിക്കുണ്ടായ മാനസികവിഷമത്തിലും അപമാനത്തിലും ഉന്നതവിദ്യാഭ്യാസ/സാമൂഹ്യനീതി വകുപ്പുകളുടെ ചുമതലയുള്ള മന്ത്രി എന്ന നിലക്ക് അദ്ദേഹത്തോട് ഐക്യദാര്ഢ്യം പ്രഖ്യാപിക്കുന്നുവെന്നു എന്നാണ് ആർ. ബിന്ദു സോഷ്യൽ മീഡിയയിലൂടെ അറിയിച്ചത്.
സംവിധായകനും തിരക്കഥാകൃത്തുമായ ജിയോ ബേബിയെ അപമാനിച്ച ഫാറൂഖ് കോളേജിന്റെ നടപടിയെ അപലപിക്കുന്നു. കാലികപ്രസക്തവും സാമൂഹ്യ പ്രതിബദ്ധത ഉയര്ത്തിപ്പിടിക്കുന്നതുമായ മികച്ച സിനിമകളാല് ശ്രദ്ധേയമായ സാന്നിദ്ധ്യമാണ് ശ്രീ ജിയോ ബേബിയുടെത്.
” ‘ദി ഗ്രേറ്റ് ഇന്ത്യന് കിച്ചന്’ എന്ന സിനിമയിലൂടെ ഇന്ത്യന് സ്ത്രീകളുടെ ദുരവസ്ഥ കൃത്യമായും വ്യക്തമായും പറയുകയും മാറ്റത്തിലേക്ക് വിരല് ചൂണ്ടുകയും ചെയ്തു.ഇപ്പോള് ‘കാതല്’ എന്ന സിനിമ ഈ സമൂഹത്തില് ഒരു വിഭാഗം മനുഷ്യര്- സ്വവര്ഗ്ഗലൈംഗികആഭിമുഖ്യമുള്ളവര് അനുഭവിക്കുന്ന ആന്തരികസംഘര്ഷങ്ങളും സമ്മര്ദ്ദങ്ങളും സമൂഹശ്രദ്ധയില് കൊണ്ടുവരുന്നു. അവരും മനുഷ്യര് ആണെന്ന് തിരിച്ചറിഞ്ഞ് അനുഭാവപൂര്ണ്ണം പെരുമാറേണ്ടുന്നതിനെ കുറിച്ച് ഓര്മ്മിപ്പിക്കുന്നു
സിനിമയുടെ സൂക്ഷ്മരാഷ്ട്രീയത്തെ കുറിച്ച് സംസാരിക്കാനായാണ് കോളേജ് ഫിലിം ക്ലബ് അദ്ദേഹത്തെ ക്ഷണിച്ചത്. അതിനുള്ള അദ്ദേഹത്തിന്റെ യോഗ്യത തന്റെ സിനിമകളിലൂടെ അദ്ദേഹം തെളിയിച്ചിട്ടുണ്ട്. പക്ഷേ, പിന്നീട് കോളേജ് യൂണിയന് ഇടപെട്ട് പരിപാടി ക്യാന്സല് ചെയ്യിച്ചു എന്നാണ് മനസ്സിലാക്കുന്നത്. ജിയോ ബേബി ഇതു സംബന്ധിച്ച് പരാതി നല്കിയിട്ടുണ്ട്. അത് സംബന്ധിച്ച് അന്വേഷിച്ച് നടപടി സ്വീകരിക്കും ശ്രീ ജിയോ ബേബിക്കുണ്ടായ മാനസികവിഷമത്തിലും അപമാനത്തിലും ഉന്നതവിദ്യാഭ്യാസ/സാമൂഹ്യനീതി വകുപ്പുകളുടെ ചുമതലയുള്ള മന്ത്രി എന്ന നിലക്ക് അദ്ദേഹത്തോട് ഐക്യം പ്രഖ്യാപിക്കുന്നു.” എന്നാണ് ആർ. ബിന്ദു ഫേയ്സ്ബുക്കിൽ കുറിച്ചത്.
ഫിലിം ക്ലബ്ബ് പരിപാടിയുമായി ബന്ധപ്പെട്ട് എത്തിച്ചേരുന്ന ഉദ്ഘാടകന്റെ പരാമർശങ്ങൾ കോളേജിന്റെ ധാർമ്മിക മൂല്യങ്ങൾക്ക് എതിരാണ്, ആയതിനാൽ പ്രസ്തുത പരിപാടിയുമായി ഫാറൂഖ് കോളേജ് വിദ്യാർഥി യൂണിയൻ സഹകരിക്കുന്നതല്ല എന്ന് പറഞ്ഞാണ് ജിയോ ബേബിയെ പരിപാടിയിൽ നിന്നും ഒഴിവാക്കിയത്. എം. എസ്. എഫിന്റെ നേതൃത്വത്തിലുള്ള വിദ്യാർത്ഥി യൂണിയനാണ് ഫാറൂഖ് കോളേജിൽ നിലവിലുള്ളത്.