തെന്നിന്ത്യന് സിനിമയില് സജീവമാണ് നടി മീന. രജനികാന്തിനൊപ്പമുള്ള ഒരു സിനിമ നിരസിച്ചതിനെ കുറിച്ച് തുറന്നു പറഞ്ഞിരിക്കുകയാണ് മീന ഇപ്പോള്. ‘പടയപ്പ’ സിനിമയില് രമ്യ കൃഷ്ണന് അവതരിപ്പിച്ച നെഗറ്റീവ് റോളിലേക്ക് ആദ്യം വിളിച്ചത് തന്നെയായിരുന്നു, അത് നിരസിക്കാന് കാരണമുണ്ടെന്നുമാണ് മീന പറയുന്നത്.
പടയപ്പ സിനിമയിലെ രമ്യ കൃഷ്ണന്റെ വളരെ പ്രശസ്തമായ നെഗറ്റീവ് റോളിലേക്ക് ആദ്യം വിളിച്ചത് തന്നെയാണ്. പക്ഷെ ആ സമയത്ത് അമ്മ അത് ചെയ്യേണ്ടെന്ന് പറഞ്ഞു. നായിക വേഷങ്ങള് ചെയ്ത് നല്ല ഇമേജില് നില്ക്കുന്ന സമയത്ത് പടയപ്പയിലെ വില്ലത്തി ഇമേജിലുള്ള വേഷം ചെയ്യുന്നത് കരിയറിനെ ബാധിക്കുമെന്ന് അമ്മ പറഞ്ഞു.
ശരിയെന്ന് തനിക്കും തോന്നി. പക്ഷെ ആ കഥാപാത്രം വളരെ വെല്ലുവിളികള് നല്കുമായിരുന്നു. രമ്യ കൃഷ്ണന് ആ വേഷം ചെയ്ത് നേടിയെടുത്ത പേരോ പ്രശസ്തിയോ അല്ല തന്റെ കുറ്റബോധത്തിന് കാരണം. താന് ചെയ്താല് ആ വേഷം ഹിറ്റാവുമോ ഇല്ലയോയെന്നത് വേറെ കാര്യമാണ്.
തനിക്ക് വ്യത്യസ്തമായി ചെയ്യാനുള്ള അവസരമായിരുന്നു. അത് ലഭിച്ചിട്ടും ചെയ്യാന് പറ്റാഞ്ഞതില് കുറ്റബോധമുണ്ട്. അമ്മയുടെ വാക്ക് കേള്ക്കാതെ സിനിമ ചെയ്യാമായിരുന്നു എന്നാണ് മീന പറയുന്നത്. 1999 ഏപ്രില് 10ന് ആണ് പടയപ്പ റിലീസ് ചെയ്യുന്നത്. രമ്യ കൃഷ്ണന്റെ നീലാംബരി എന്ന കഥാപാത്രം ഏറെ ശ്രദ്ധ നേടിയിരുന്നു.