ആമസോണ് പ്രൈമില് റിലീസ് ചെയ്ത പൃഥ്വിരാജ് ചിത്രം കുരുതിയ്ക്ക് മികച്ച പ്രതികരണങ്ങളാണ് സോഷ്യല് മീഡിയയില് ലഭിക്കുന്നത്. സംവിധാന മികവിനെയും പ്രമേയത്തെയും അഭിനയ മികവിനെക്കുറിച്ചും സംസാരിക്കുന്നവര് മൂസാക്ക എന്ന മാമുക്കോയയുടെ കഥാപാത്രത്തെക്കുറിച്ച് എടുത്തുപറയുന്നുണ്ട്. ചിത്രത്തില് പകരം വെക്കാനില്ലാത്ത അഭിനയമാണ് മാമുക്കോയ കാഴ്ച്ച വെച്ചിരിക്കുന്നതെന്നാണ് പ്രേക്ഷകരുടെ അഭിപ്രായം.
ഇപ്പോഴിതാ തന്റെ മൂസാക്ക എന്ന കഥാപാത്രത്തെക്കുറിച്ച് മനസ്സുതുറന്നിരിക്കുകയാണ് മാമുക്കോയ. മനോരമയുമായുള്ള അഭിമുഖത്തിലാണ് അദ്ദേഹം മനസ്സുതുറന്നത്. എന്റെ കഥാപാത്രം എനിക്ക് വളരെയേറെ ഇഷ്ടപ്പെട്ടു. എന്നുകരുതി എനിക്ക് കിട്ടിയതില് വച്ച് ഏറ്റവും മികച്ചത് എന്ന് പറയാന് പറ്റില്ല. എനിക്ക് കിട്ടിയ മികച്ച വേഷങ്ങളില് ഒന്നാണ് ഇത്. പെരുമഴക്കാലത്തിലെ കഥാപാത്രം മികച്ചതായിരുന്നു. മാമുക്കോയ പറയുന്നു.
നൂറുശതമാനം കുരുതി പൃഥ്വിരാജിന്റെ തന്നെയാണെന്ന് മാമുക്കോയ പറഞ്ഞു. തങ്ങളൊക്കെ ചെന്ന് ഓരോ വേഷം ചെയ്യുന്നു എന്നല്ലാതെ വിജയത്തിന്റെ മുഴുവന് അവകാശി പൃഥ്വിരാജ് ആണെന്ന് അദ്ദേഹം വ്യക്തമാക്കി. . മനുഷ്യരെ അറിയുന്ന, അഭിനയം അറിയുന്ന, സിനിമ നന്നായി അറിയുന്ന ഒരു നല്ല വ്യക്തിയാണ് പൃഥ്വിരാജ്. ഒന്നും ചര്ച്ച ചെയ്യേണ്ട കാര്യംപോലും ഇല്ല നമ്മള് ഉദ്ദേശിക്കുന്നത് അദ്ദേഹത്തിന് അറിയാം. നന്നായി പഠിച്ചിട്ടാണ് ഓരോന്നും ചെയ്യുന്നത്. വെറുതെ ചാടിക്കേറി ഒന്നും ചെയ്യുന്ന ആളല്ല പൃഥ്വിരാജ്. മാമുക്കോയ കൂട്ടിച്ചേര്ത്തു.