മെഗാ സ്റ്റാര് മമ്മൂട്ടിയെ നായകനാക്കി തമിഴ് സംവിധായകന് റാം ഒരുക്കിയ ചിത്രമാണ് പേരമ്പ്. മമ്മൂട്ടി, സാധന എന്നിവര് മുഖ്യ വേഷങ്ങളില് അഭിനയിച്ച ഈ ചിത്രം വലിയ നിരൂപക പ്രശംസയാണ് നേടിയെടുത്തത്. രോഗബാധിതയായ മകള്ക്കൊപ്പം ജീവിക്കുന്ന അമുദവന് എന്ന അച്ഛന് കഥാപാത്രത്തെയാണ് മമ്മൂട്ടി ഈ ചിത്രത്തില് അവതരിപ്പിച്ചത്.
ചിത്രവുമായി ബന്ധപെട്ടു ഒരാള് മമ്മൂട്ടിയോട് ചോദിച്ച ഒരു ചോദ്യവും അതിനു മമ്മൂട്ടി നല്കിയ ഉത്തരവും എന്തായിരുന്നു എന്ന് വെളിപ്പെടുത്തുകയാണ് സംവിധായകന് റാം. ഒരു പുരസ്കാരദാന ചടങ്ങില് മമ്മൂക്കയോട് എങ്ങനെ ഈ സിനിമ ഇത്ര വൈകാരികമായി ചെയ്തു എന്നാണ് അവതാരകന് ചോദിച്ചത്. അതിനു മമ്മൂട്ടി നല്കിയ മറുപടി, എന്റെ മകള്ക്കാണ് ഇത് വന്നതെങ്കില് എന്ന് ഞാന് ഉള്ളില് ചിന്തിച്ചു എന്നാണ്. മമ്മൂട്ടി പറഞ്ഞ ആ ഉത്തരത്തില് ആ നടന്റെയും ആ പിതാവിന്റെയും എല്ലാ വികാരങ്ങളും ഉണ്ടായിരുന്നു എന്നും റാം കൂട്ടിച്ചേര്ക്കുന്നു.
അതിമനോഹരമായി ആണ് മമ്മൂട്ടി ആ വേഷം ചെയ്തത് എന്നും ഒട്ടും നാടകീയത ഇല്ലാതെ മമ്മൂട്ടി അമുദവന് ജീവന് പകര്ന്നെന്നും റാം പറഞ്ഞു. താന് ഉദ്ദേശിക്കുന്നതിനു മുകളില് ഒരു നടന് അഭിനയിക്കുമ്പോള് ആണ് ഒരു സംവിധായകന് ഒട്ടും സമ്മര്ദ്ദം ഇല്ലാതെ ജോലി ചെയ്യാന് കഴിയുന്നത് എന്നും, മമ്മൂട്ടിയെ പോലെ ഒരു മഹാനടനെ കിട്ടിയത് കൊണ്ടാണ് പേരമ്പ് പോലുള്ള ചിത്രം ഇത്ര നന്നായി ചെയ്യാന് തനിക്കു സാധിച്ചതെന്നും റാം പറയുന്നു.
പാപ്പാ എന്ന മകള് ആയി സാധനയും ഗംഭീര പ്രകടനം കാഴ്ച വെച്ച ചിത്രത്തില് അഞ്ജലി, അഞ്ജലി അമീര് എന്നിവരും നിര്ണായക വേഷങ്ങള് ചെയ്തിട്ടുണ്ട്.