മമ്മൂട്ടി അമല് നീരദ് ചിത്രം ബിഗ് ബിയുടെ രണ്ടാം ഭാഗമായ ബിലാലിനായുള്ള കാത്തിരിപ്പിലാണ് ആരാധകര്. പ്രഖ്യാപന ശേഷം മാറിമാറി വന്ന പല സാഹചര്യങ്ങളും കോവിഡ് പ്രതിസന്ധിയും മൂലം ഈ സിനിമയുടെ ചിത്രീകരണം വര്ഷങ്ങളോളം വൈകി. എന്നാല് ആരാധകര്ക്ക് വീണ്ടും പ്രതീക്ഷയേകുന്നതായിരുന്നു ഈ അടുത്തിടെ നടന്ന ചില അഭിമുഖങ്ങളില് ബിലാല് വരുമെന്നും എന്നാല് അതുടനെ ഉണ്ടാവില്ലെന്നും പറഞ്ഞത്.
തിരക്കഥ ഒന്ന് കൂടി വര്ക്ക് ചെയ്യണമെന്നും, ചിലപ്പോള് അതിനു മുന്പേ മമ്മൂട്ടിയുമായി വേറെ ചെറിയ ചിത്രം ഉണ്ടായേക്കാമെന്നും അദ്ദേഹം പറഞ്ഞിരുന്നു. ഇപ്പോഴിതാ ചിത്രത്തെക്കുറിച്ച് സോഷ്യല്മീഡിയയില് പുതിയൊരു പ്രചരണം നടക്കുകയാണ് . ബിലാലില് മമ്മൂട്ടിക്കൊപ്പം മകന് ദുല്ഖര് സല്മാനും അഭിനയിക്കുന്നുണ്ടെന്നും അബു എന്ന കഥാപാത്രമായാണ് ദുല്ഖര് എത്തുന്നതെന്നുമാണ് അത്.
എന്നാല് ആ വാര്ത്തയില് യാതൊരു സത്യവുമില്ലെന്നും അത് വെറും കെട്ടുകഥ മാത്രമാണെന്നും മമ്മൂട്ടിയോടടുത്ത വൃത്തങ്ങള് സോഷ്യല് മീഡിയയില് പറയുന്നു. ബിലാല് വരുമെന്നും എന്നാല് അതിന്റെ ബാക്കി കാര്യങ്ങളൊന്നും തന്നെ തീരുമാനമായിട്ടില്ലെന്നുമാണ് അറിയാന് സാധിക്കുന്നത്. മമ്മൂട്ടി- അമല് നീരദ് കൂട്ടുകെട്ടില് നിന്ന് ഈ വര്ഷം പുറത്തു വന്ന ഭീഷ്മ പര്വ്വം എന്ന ചിത്രം സൂപ്പര് ഹിറ്റായിരുന്നു.
സംവിധായകന് അമല് നീരദിന്റെ അരങ്ങേറ്റ ചിത്രമായിരുന്നു ബിഗ് ബി. രണ്ടു വര്ഷം മുമ്പാണ് രണ്ടാം ഭാഗം എത്തുമെന്ന് സംവിധായകന് പ്രഖ്യാപിച്ചത്. ഈ വര്ഷം മാര്ച്ച് 26-ന് ചിത്രീകരണം തുടങ്ങാനിരുന്ന സിനിമ കോവിഡ് കാരണം മാറ്റി വെയ്ക്കുകയായിരുന്നു. ഉണ്ണി ആര് ആണ് ചിത്രത്തിന്റെ രചന. ഗോപി സുന്ദര് സംഗീതവും പശ്ചാത്തല സംഗീതവും ഒരുക്കുന്നു.