വിവാഹം ചെയ്ത് കുട്ടികളും കുടുംബവുമായി സെറ്റില് ചെയ്യാനുള്ള ആഗ്രഹത്തെ കുറിച്ച് പറഞ്ഞ് നടി മാളവിക മോഹനന്. സിനിമയില് നിന്നുള്ള ആള് തന്നെ ഭര്ത്താവായി വേണമെന്നില്ല, അങ്ങനെ ആയാലും കുഴപ്പമില്ല. എന്നാല് തനിക്ക് മക്കള് വേണം. താന് പാചകം ചെയ്ത് അവര്ക്ക് ഭക്ഷണം നല്കണം. തന്റെ അമ്മ തന്ന ഓര്മ്മകള് അവര്ക്ക് നല്കണം എന്നാണ് മാളവിക പറയുന്നത്.
സിനിമാ രംഗത്ത് നിന്നുള്ള ആളായാലും അല്ലെങ്കിലും കുഴപ്പമില്ലെന്ന് നടി പറയുന്നു. കുട്ടികള് വേണം. എനിക്ക് കുട്ടികളെ ഇഷ്ടമാണ്. വളരെ സ്ട്രോങായ മറ്റേര്ണല് ഇന്സ്റ്റിങ്റ്റ് എനിക്കുണ്ടെന്ന് കരുതുന്നു. ഭാവിയില് തീര്ച്ചയായും മക്കള് വേണം. എന്റെ മീന് കറിയും മറ്റും കുട്ടികള്ക്ക് നല്കണം. എനിക്ക് എന്റെ അമ്മ തന്ന ഓര്മ്മകള് മക്കള്ക്ക് നല്കണം.
അവര്ക്ക് വേണ്ടി പാചകം ചെയ്യണം. എന്റെ കൈ കൊണ്ടുണ്ടാക്കിയത് അവരെ കഴിപ്പിക്കണം. ഇതെല്ലാം എന്റെ ആഗ്രഹമാണ് എന്നാണ് മാളവിക ഒരു അഭിമുഖത്തില് പറയുന്നത്. അതേസമയം, മാസ്റ്റര് സിനിമയുടെ ഷൂട്ടിംഗിനിടെ ആരാധകന് തനിക്ക് വിവാഹക്ഷണക്കത്ത് സമ്മാനമായി നല്കിയതിനെ കുറിച്ചും മാളവിക പറയുന്നുണ്ട്. ഷൂട്ടിംഗ് നഗരത്തില് നിന്നും മാറിയുള്ള സ്ഥലമായിരുന്നു.
ഒരു ആരാധകന് എനിക്ക് ഒരു പ്രിന്റ് ഔട്ട് തന്നു. പെയിന്റിംഗോ മറ്റോ ആയിരിക്കുമെന്ന് ഞാന് കരുതി. പക്ഷെ വിവാഹക്ഷണക്കത്തായിരുന്നു അത്. അയാളുടെയും എന്റെയും പേരാണ് ക്ഷണക്കത്തിലുള്ളത്. ഞാന് പോലും തിരിച്ചറിയാതെ ഞാന് കമ്മിറ്റഡായോ എന്ന് തോന്നി. എങ്ങനെ പ്രതികരിക്കണം എന്നറിയില്ലായിരുന്നു എന്നാണ് മാളവിക പറയുന്നത്.
നിലവില് ‘ദ രാജാ സാബ്’ ആണ് മാളവികയുടെതായി ഒരുങ്ങുന്ന ഏറ്റവും പുതിയ ചിത്രം. പ്രഭാസ് ആണ് ചിത്രത്തില് നായകനാകുന്നത്. തമിഴില് കാര്ത്തി നായകനാകുന്ന ‘സര്ദാര് 2’ എന്ന ചിത്രവും മാളവികയുടെതായി ഒരുങ്ങുന്നുണ്ട്. തങ്കലാന്, യുദ്ര എന്നീ ചിത്രങ്ങളാണ് നടിയുടെതായി ഒടുവില് തിയേറ്ററുകളിലേക്ക് എത്തിയത്.