രേവതി സംവിധാനം ചെയ്യുന്ന ‘സലാം വെങ്കി’ എന്ന ചിത്രത്തില്‍ കാജോളിനൊപ്പം അഭിനയിച്ച അനുഭവങ്ങള്‍ പങ്കുവച്ച് നടി മാല പാര്‍വതി. ബോളിവുഡ് താരമാണെങ്കിലും സൗഹൃദ പൂര്‍ണ്ണമായ പെരുമാറ്റം കൊണ്ട് തന്നെ കാജോള്‍ അതിശയിപ്പിച്ചു എന്നാണ് മാല പാര്‍വതി പറയുന്നത്.
വളരെ ഫ്രണ്ട്ലിയാണ് കാജോള്‍. സെറ്റില്‍ കുട്ടികളെ പോലെയാണ്. കളിക്കുകയും തമാശ പറയുകയും ഒക്കെ ചെയ്യുന്ന ഒരാള്‍. ഒരു ദിവസം ഷോട്ട് കഴിഞ്ഞ് കട്ട് പറഞ്ഞതും ‘ഭാഗോ’ എന്നു പറഞ്ഞ് ഓടുന്നത് കണ്ടു. കാജോളിന് അന്ന് എവിടെയോ പോകാനുണ്ടായിരുന്നു.
കുറച്ച് സമയം വൈകിയതിനാലാണ് കൊച്ചു കുട്ടികളെ പോലെ ഷൂട്ട് കഴിഞ്ഞതും ഓടിയത്. സെറ്റില്‍ റിഹേഴ്‌സല്‍ കഴിയുമ്പോള്‍ തങ്ങള്‍ ഓരോരുത്തരും രേവതിയുടെ അടുത്തു പോയിട്ട് കറക്ഷന്‍ ഉണ്ടോയെന്ന് ചോദിക്കും. ഒരു തവണ മറ്റു അഭിനേതാക്കള്‍ക്കൊപ്പം താനും ക്യൂ നില്‍ക്കുകയായിരുന്നു.
കാജോളിന് തൊട്ടു മുമ്പിലായിരുന്നു താന്‍. തമാശയ്ക്ക് തന്നെ കൈ കൊണ്ട് ഒരൊറ്റ അടി അടിച്ച് ‘നിങ്ങള്‍ക്ക് കറക്ഷന്‍ ഒന്നുമില്ല, എല്ലാം കറക്ടാണ്, ഗോ ഗോ’ എന്നു പറഞ്ഞു. ബോളിവുഡിലെ ഇത്രയും വലിയൊരു നടിയാണെന്ന യാതൊരു ഭാവവും കാജോളിന് ഇല്ല.
എല്ലാവരോടും വളരെ സൗഹൃദത്തോടെയാണ് പെരുമാറ്റം എന്നാണ് മാല പാര്‍വതി പറയുന്നത്. അതുപോലെ മികച്ച അഭിനേത്രിക്കൊപ്പം മികച്ച സംവിധായിക കൂടിയാണ് രേവതി എന്നും താരം പറയുന്നുണ്ട്. അഭിനേതാക്കളെ പൂര്‍ണമായും മനസിലാക്കി സ്‌നേഹത്തോടെയും ശാന്തതയോടെയും പെരുമാറുന്ന ആളാണ് രേവതിയെന്നും മാല പാര്‍വതി വ്യക്തമാക്കി.