ആദ്യം മറ്റൊന്നായിരുന്നു പ്ലാൻ ചെയ്തത്, ബിരിയാണി സീൻ പിന്നീട് കൂട്ടിച്ചേർത്തത്: ലോകേഷ് കനകരാജ്

ലോകേഷ് കനകരാജിന്റെ എക്കാലത്തെയും ഹിറ്റ് ചിത്രങ്ങളിൽ ഒന്നാണ്
കാർത്തി നായകനായെത്തിയ കൈതി. വലിയ പ്രീ റിലീസ് ഹൈപ്പുകളോ മറ്റോ ഇല്ലാതെ വന്ന് ഗംഭീര വിജയം സ്വന്തമാക്കിയ സിനിമ കൂടിയാണ് കൈതി.

സിനിമയിലെ ‘ബിരിയാണി സീൻ’ ഇന്നും പ്രേക്ഷകർക്ക് പ്രിയപ്പെട്ടതാണ്. പൊലീസുകാരെല്ലാം ബോധം കേട്ട അവശരായി പോവുമ്പോൾ കാർത്തി ബിരിയാണി കഴിക്കുന്ന രംഗം വളരെ ചർച്ചയായിരുന്നു. എന്നാൽ ഈ രംഗം സിനിമയിൽ ആദ്യം ഇല്ലായിരുന്നു എന്നാണ് ലോകേഷ് കനകരാജ് പറയുന്നത്.

‘സത്യത്തിൽ വെള്ളം കുടിക്കുന്ന സീനായിരുന്നു ഉണ്ടായിരുന്നത്. ജയിലിൽ നിന്നും വർഷങ്ങൾക്ക് ശേഷം പുറത്ത് വരുന്ന നായകൻ, എന്തുവന്നാലും ദാഹത്തിന് വെള്ളം കുടിക്കുമല്ലോ. പിന്നെ ഈ സീനിന്റെ ചർച്ചക്കിടയിലാണ് ബിരിയാണി ആക്കിയാലോ എന്ന് ആലോചിച്ചത്. മൂടിവെച്ചിരിക്കുന്ന ബിരിയാണി, സാധാരണ രംഗങ്ങളിൽ നിന്നു വ്യത്യസ്തമായി ചെയ്യാമെന്ന് വിചാരിച്ചു. കുറെ പേര് ബോധം കെട്ട് കിടക്കുമ്പോൾ അതൊന്നും മൈൻഡ് ചെയ്യാതെ ഒരാൾ ബിരിയാണി കഴിച്ചാൽ എങ്ങനെയിരിക്കും എന്ന ചിന്തയിൽ നിന്നുമാണ് ആ രംഗം ഉണ്ടായത്.”

കൈതി രണ്ടാം ഭാഗത്തിന് വേണ്ടി കാത്തിരിപ്പിലാണ് തെന്നിന്ത്യൻ പ്രേക്ഷകർ. എൽസിയുവിലെ എല്ലാ കഥാപാത്രങ്ങളും കൈതി രണ്ടാം ഭാഗത്തിൽ വരുമെന്നാണ് പ്രേക്ഷകർ പ്രതീക്ഷിക്കുന്നത്. ചിത്രത്തിനിടെ ഷൂട്ടിംഗ് അടുത്ത വർഷം ആരംഭിക്കുമെന്നാണ് പുറത്തുവരുന്ന റിപ്പോർട്ടുകൾ.