അല്‍ഫോന്‍സ് പുത്രന്റെ ‘പ്രേമം’ ഒരുപാട് ആഘോഷിക്കപ്പെട്ട മലയാള ചിത്രങ്ങളില്‍ ഒന്നാണ്. പ്രേമം സിനിമയെ കുറിച്ച് അല്‍ഫോന്‍സ് പുത്രന്റെ സുഹൃത്തും നടനുമായ കൃഷ്ണ ശങ്കര്‍ പറഞ്ഞ കാര്യമാണ് ഇപ്പോള്‍ ശ്രദ്ധ നേടുന്നത്. പ്രേമത്തില്‍ മോഹന്‍ലാലും ഉണ്ടായിരുന്നു എന്നാണ് കൃഷ്ണ ശങ്കര്‍ പറയുന്നത്.
”പ്രേമം സിനിമയില്‍ ശരിക്കും ലാല്‍ സാര്‍ ഉണ്ടായിരുന്നു. തിരക്കഥ എഴുതുമ്പോള്‍ ലാല്‍ സാറിന്റെ ചെറിയൊരു കഥാപാത്രം അതിലുണ്ടായിരുന്നു, ഒരു പള്ളീലച്ചന്റെ കഥാപാത്രം. എഴുതി വന്നപ്പോള്‍ മൂന്ന് പ്രണയങ്ങള്‍ എങ്ങനെ ഉള്‍ക്കൊള്ളിക്കാം എന്നതിന് വലിയ പ്രാധാന്യം വന്നു.”
”അങ്ങനെ വന്നപ്പോള്‍ പോയ സംഭവമാണ് അത്. കഥ ഞാന്‍ പറയില്ല. അല്‍ഫോന്‍സ് എന്തായാലും ലാല്‍ സാറിനെ വച്ച് സിനിമ ചെയ്യും” എന്നാണ് കൃഷ്ണ ശങ്കര്‍ സില്ലി മോങ്ക്‌സ് മോളിവുഡിന് നല്‍കിയ അഭിമുഖത്തില്‍ പറയുന്നത്.
അതുപോലെ പ്രേമത്തിലെ ഫൈറ്റ് സീന്‍ ചെയ്യുമ്പോള്‍ സ്ഫടികത്തിലെ ഫൈറ്റ് ആണ് റഫറന്‍സ് ആയി കാണിച്ച് തന്നതെന്നും നടന്‍ വ്യക്തമാക്കുന്നുണ്ട്. ഓടിനടന്ന് അടിക്കുക എന്നതായിരുന്നു റഫറന്‍സ്. എന്തായാലും അല്‍ഫോന്‍സും മോഹന്‍ലാലും ഒന്നിക്കും എന്നാണ് കൃഷ്ണ ശങ്കര്‍ വ്യക്തമാക്കുന്നു.