വിജയ് സേതുപതിയെയും കത്രീന കൈഫിനെയും പ്രധാന കഥാപാത്രങ്ങളാക്കി ശ്രീറാം രാഘവൻ സംവിധാനം ചെയ്യുന്ന ഏറ്റവും പുതിയ ചിത്രമാണ് ‘മെറി ക്രിസ്മസ്’. ജനുവരി 12 നാണ് ചിത്രം തിയേറ്ററുകളിൽ എത്തുന്നത്.
ഇപ്പോഴിതാ വിജയ് സേതുപതിയെ കുറിച്ച് കത്രീന കൈഫ് പറഞ്ഞ വാക്കുകളാണ് ചർച്ചയാവുന്നത്. ഇന്ന് ഇന്ത്യൻ സിനിമയിലെ ഏറ്റവും മികച്ച നടന്മാരിൽ ഒരാളാണ് വിജയ് സേതുപതി എന്നാണ് കത്രീന പറഞ്ഞത്.
“ഇന്ന് സിനിമ മേഖലയിലുള്ളതില് വെച്ച് ഏറ്റവും മികച്ച നടനാണ് വിജയ് സേതുപതി. അദ്ദേഹത്തെ പോലെ ഒരു നടനൊപ്പം സിനിമ ചെയ്യുമ്പോള് വളരെ ആവേശത്തിലായിരുന്നു ഞാന്. ഷൂട്ടിന് മുന്പുള്ള റിഹേഴ്സല് സമയത്ത് ഞങ്ങള് തമ്മില് ഒരുപാട് സംസാരിച്ചു. അദ്ദേഹം കഥാപാത്രത്തെ കുറിച്ച് ചിന്തിക്കുന്ന രീതി തന്നെ വളരെ വ്യത്യസ്തമാണ്.
അത് എന്നെ ആകർഷിക്കുകയും നോക്കി പഠിക്കുകയും ചെയ്തു. മെറി ക്രിസ്മസിന്റ ഫൈനൽ ഔട്ട് കണ്ടപ്പോൾ ഞാൻ സംവിധായകനോട് പറഞ്ഞു എന്റെയും വിജയ്യുടെയും കഥാപാത്രങ്ങൾ തമ്മിൽ ഇത്രയും കെമിസ്ട്രി ഉണ്ടായിരുന്നു എന്ന് പ്രതീക്ഷിച്ചിരുന്നില്ല എന്ന്.” എന്നാണ് ഒരു ബോളിവുഡ് മാധ്യമത്തിന് നൽകിയ അഭിമുഖത്തിൽ കത്രീന കൈഫ് പറഞ്ഞത്.
ബദ്ലപൂർ, അന്ധദുൻ എന്നീ ചിത്രങ്ങൾക്ക് ശേഷം ശ്രീറാം രാഘവൻ സംവിധാനം ചെയ്യുന്ന ചിത്രമായതുകൊണ്ട് തന്നെ വലിയ പ്രതീക്ഷയോടെയാണ് മെറി ക്രിസ്മസിനെ പ്രേക്ഷകർ നോക്കിക്കാണുന്നത്. അശ്വിനി കലേസ്കര്, രാധിക ആപ്തെ തുടങ്ങിയവരും ചിത്രത്തിൽ പ്രധാന വേഷത്തിലെത്തുന്നുണ്ട്. മലയാളിയായ മധു നീലകണ്ഠൻ ആണ് ചിത്രത്തിന് ഛായാഗ്രഹണം നിർവഹിക്കുന്നത്.