വിജയ്യുടെ രാഷ്ട്രീയ പ്രവേശനത്തില് ആശംസകളുമായി സംവിധായകന് കാര്ത്തിക് സുബ്ബരാജും. പുതിയ തുടക്കത്തിന് എല്ലാ വിധ പിന്തുണയും അറിയിക്കുന്നുവെന്ന് സംവിധായകന് സോഷ്യല് മീഡിയയില് പോസ്റ്റ് ചെയ്തു. നേരത്തെ ‘കങ്കുവ’യുടെ ഓഡിയോ റിലീസില് നടന് സൂര്യയും വിജയ്ക്ക് ആശംസകള് അറിയിച്ചിരുന്നു.
അതേസമയം, വിജയ്യുടെ തമിഴക വെട്രി കഴകത്തിന്റെ ആദ്യ സമ്മേളനം വിഴുപ്പുറത്തെ വിക്രവണ്ടിയില് ഇന്ന് വൈകിട്ട് നാല് മണിക്ക് ആരംഭിക്കും. സമ്മേളനത്തില് അധ്യക്ഷന് വിജയ് പാര്ട്ടിയുടെ നയവും ലക്ഷ്യവും പ്രഖ്യാപിക്കും. സമ്മേളനത്തിനായി വിക്രവണ്ടിയില് 85 ഏക്കര് മൈതാനത്ത് വിശാലമായ വേദിയും പ്രവര്ത്തകര്ക്കിരിക്കാനുള്ള സൗകര്യവും ഒരുക്കിയിട്ടുണ്ട്.
110 അടി ഉയരമുള്ള കൊടിമരത്തില് ചുവപ്പും മഞ്ഞയും കലര്ന്ന പാര്ട്ടി പതാക റിമോട്ട് ഉപയോഗിച്ച് വിജയ് ഉയര്ത്തും. 600 മീറ്ററോളമുള്ള റാംപിലൂടെ നടന്ന് പ്രവര്ത്തകരെ അഭിവാദ്യം ചെയ്ത ശേഷമാണ് വിജയ് വേദിയിലെത്തുക. അരലക്ഷം പേര്ക്ക് ഇരിക്കാനുള്ള കസേരകള് തയാറാക്കിയിട്ടുണ്ട്.
മറ്റുള്ളവര്ക്കായി കൂറ്റന് വീഡിയോ വാളുകളുമുണ്ട്. വിജയ്ക്കും മറ്റു വിശിഷ്ടാതിഥികള്ക്കുമായി 5 കാരവാനുകളും ഒരുക്കിയിട്ടുണ്ട്. അയ്യായിരത്തിലധികം പൊലീസുകാരെ സുരക്ഷയ്ക്കായി നിയോഗിച്ചിട്ടുണ്ട്. മദ്യപിച്ചെത്തുന്നവരെ സമ്മേളന സ്ഥലത്തേക്ക് പ്രവേശിപ്പിക്കില്ല.
റോഡ് നിയമങ്ങള് കൃത്യമായി പാലിക്കണമെന്നും നിയമവിരുദ്ധ പ്രവര്ത്തനങ്ങള് നടത്തരുതെന്നും വിജയ് തന്റെ അണികളോട് ആഹ്വാനം ചെയ്തിരുന്നു. അതേസമയം, കേരളം, ആന്ധ്രപ്രദേശ്, കര്ണാടക എന്നീ സംസ്ഥാനങ്ങളില് നിന്നുള്ള ആരാധകരും സമ്മേളനത്തിനെത്തും.