ഒരു നീണ്ട ഇടവേളയ്ക്ക് ശേഷം സുരേഷ് ഗോപിയുടെ ശക്തമായ തിരിച്ചുവരവ് പ്രതീക്ഷിക്കുന്ന സിനിമയാണ് ‘കാവല്’. നിഥിന് രണ്ജി പണിക്കരാണ് ചിത്രം സംവിധാനം ചെയ്യുന്നത്. നവംബര് 25 നാണ് ചിത്രം തിയേറ്ററിലെത്തുന്നത്. ഈ സിനിമയുടെ റിലീസുമായി ബന്ധപ്പെട്ട് പോസ്റ്റര് ചെയ്തുകൊണ്ട് നിര്മാതാവ് ജോബി ജോര്ജ് ഫെയ്സ്ബുക്കില് ഒരു കുറിപ്പ് പങ്കുവെച്ചിരുന്നു. ‘ഇത് തമ്പാന്…സ്നേഹിക്കുന്നവര്ക്ക് കാവലാകുന്ന തമ്പാന് നവംബര് 25 മുതല് കാവല്,’ എന്നായിരുന്നു പോസ്റ്റിലെ വാചകം.
മരക്കാര് അറബിക്കടലിന്റെ സിംഹം റിലീസിനൊരുങ്ങുന്ന പശ്ചാത്തലത്തില് കാവലിന്റെ റിലീസ് മാറ്റിവെക്കണമെന്നാവശ്യപ്പെട്ടായിരുന്നു ചിലര് പോസ്റ്റിന് രംഗത്തെത്തിയത്. ഇതോടെ മറുപടിയുമായി ജോബി ജോര്ജും എത്തി. ‘മോനെ ഞാന് നേരത്തെ പ്ലാന് ചെയ്തതാ, അത് മാത്രമല്ല പല കമ്മിറ്റ്മെന്റ്സ് ഉണ്ട്. ദയവു ചെയ്ത മനസിലാക്കൂ’ എന്നായിരുന്നു ജോബിയുടെ മറുപടി.
അതേസമയം, ഒരാളുടെ കമന്റിന് ജോബി ജോര്ജ് നല്കിയ മറുപടിയും വൈറലാവുന്നുണ്ട്. ‘മരക്കാറിന് മുന്നില് പിടിച്ചു നില്ക്കാനുള്ള ആമ്പിയര് ഒക്കെ ഈ ഐറ്റത്തിന് ഉണ്ടോ?’ എന്നായിരുന്നു ചോദ്യം.
‘അതൊന്നും എനിക്കറിയില്ല. ഞാന് പഠിച്ചിട്ടുണ്ട് ഒരു പൊട്ടനുറുമ്പ് ഒരു ആനയെ വീഴ്ത്തിയ കഥ’ എന്നായിരുന്നു ഇതിന് ജോബി ജോര്ജ് നല്കിയ മറുപടി. മരക്കാര് അറബിക്കടലിന്റെ സിംഹം’ ആദ്യം ഒ.ടി.ടി പ്ലാറ്റ്ഫോമിലാണ് റിലീസ് ചെയ്യാന് തീരുമാനിച്ചിരുന്നതെങ്കിലും പിന്നീട് തിയേറ്റര് റിലീസ് പ്രഖ്യാപിക്കുകയായിരുന്നു.
ഹൈറേഞ്ചിന്റെ പശ്ചാത്തലത്തിലൊരുക്കിയ കാവല് ഒരു ആക്ഷന് ഫാമിലി ഡ്രാമയാണ്. തമ്പാന് എന്ന കഥാപാത്രത്തെയാണ് ചിത്രത്തില് സുരേഷ് ഗോപി അവതരിപ്പിക്കുന്നത്. നിഖില് എസ് പ്രവീണ് ആണ് ഛായാഗ്രഹണം. രണ്ജി പണിക്കരും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
ശങ്കര് രാമകൃഷ്ണന്, സുരേഷ് കൃഷ്ണ, പത്മരാജ് രതീഷ്, ശ്രീജിത്ത് രവി, സാദ്ദിഖ്, രാജേഷ് ശര്മ്മ, സന്തോഷ് കീഴാറ്റൂര്, കിച്ചു ടെല്ലസ്, ബിനു പപ്പു, രാജേഷ് ശര്മ്മ, കണ്ണന് രാജന് പി. ദേവ്, ചാലി പാല, അരിസ്റ്റോ സുരേഷ്, ഇവാന് അനില്, റേയ്ച്ചല് ഡേവിഡ്, മുത്തുമണി, അഞ്ജലി നായര്, അനിത നായര്, പൗളി വത്സന്, അംബിക മോഹന്, ശാന്ത കുമാരി, ബേബി പാര്വ്വതി തുടങ്ങിയവരാണ് ചിത്രത്തിലെ മറ്റു താരങ്ങള്.