‘മണിച്ചിത്രത്താഴ്’ സിനിമയിലെ ഓരോ രംഗങ്ങളും സംഭാഷണ ശകലങ്ങളുമൊക്കെ മലയാളി പ്രേക്ഷകര്ക്ക് കാണാപാഠമാണ്. സിബി മലയില്, പ്രിയദര്ശന്, സിദ്ദിഖ്-ലാല് എന്നീ നാല് സംവിധായകര്ക്കൊപ്പമാണ് ഫാസില് മണിച്ചിത്രത്താഴ് ഒരുക്കിയത്. സിനിമയില് അഭിനയിച്ചതിന്റെ ഓര്മ്മകള് പങ്കുവ്ച്ചിരിക്കുകയാണ് കെബി ഗണേഷ് കുമാര് ഇപ്പോള്.
കേരള നിയമസഭയുടെ ഇന്റര്നാഷണല് ബുക്ക് ഫെസ്റ്റിവലിലെ സിനിമയും എഴുത്തും എന്ന ചര്ച്ചയില് പങ്കെടുത്ത് സംസാരിക്കുകയായിരുന്നു ഗണേഷ്. താന് അദ്ഭുതകരമായ സ്ക്രിപ്റ്റ് കണ്ടിട്ടുള്ളത് രണ്ടു സ്ഥലങ്ങളിലാണ്. ഒന്ന് ഫാസിലിന്റെ മണിച്ചിത്രത്താഴ് ആണ്. അഞ്ചു സംവിധായകരാണ് അത് സംവിധാനം ചെയ്തത്.
പാച്ചിക്ക സംവിധാനം ചെയ്തിട്ടുണ്ട്, ഒരു സ്ഥലത്ത് പ്രിയദര്ശന്, ഒരിടത്ത് സിബി മലയില്, ഒരിടത്ത് സിദ്ദിഖ് ലാല്. ഈ അഞ്ചു പേരുടെയും കൂടെ ഞാന് അഭിനയിച്ചിട്ടുണ്ട്. ”ദാസപ്പാ നീ എന്നെ ഒന്നു നോക്കിയേ” എന്നു പറയുന്ന രംഗം സിബി മലയില് ആണ് ഷൂട്ട് ചെയ്തത്.
നാഗവല്ലിയെ കണ്ട് താന് അലറി വിളിച്ചു കരയുന്നത് സിദ്ദിഖ്-ലാല് ആണ് ചെയ്തത്. കുറച്ചു ഭാഗം പ്രിയദര്ശന് എടുത്തിട്ടുണ്ട്. അങ്ങനെ അഞ്ച് പേരോടൊപ്പവും താന് അതില് വര്ക്ക് ചെയ്തു. ഒരു സ്ക്രിപ്റ്റിനെ ഒരു പരിസരത്തുള്ള ലൊക്കേഷനുകളില് വച്ച് വിവിധ സംവിധായകര് എടുത്ത് ആ സിനിമ സൂപ്പര് ഹിറ്റ് ആവുക എന്ന് പറയുന്നത് ഒരു അദ്ഭുതമാണ്.
അതിനു മുമ്പും ശേഷവും അങ്ങനെ ഒരു അദ്ഭുതം ഉണ്ടായിട്ടില്ല. ആദ്യം പാച്ചിക്ക സംവിധായകനും ക്യാമറാമാനും ഒരു ഐഡിയ കൊടുക്കും. അതു കേട്ട് മനസിലാക്കിയിട്ട് അവര് ചെയ്തത് അഞ്ചും നമുക്കു തിരിച്ചറിയാന് പറ്റില്ല എന്നാണ് ഗണേഷ് പറയുന്നത്.