ഒരു പ്രായം കഴിഞ്ഞാല് സ്ത്രീകള്ക്ക് വലിയ താരങ്ങള്ക്കൊപ്പം അഭിനയിക്കാന് അവസരം ലഭിക്കില്ലെന്ന് നടി ജ്യോതിക. 28-ാം വയസില് അമ്മയായ തനിക്ക് പിന്നീട് വലിയ താരങ്ങള്ക്കൊപ്പമോ ഹീറോയ്ക്കൊപ്പമോ അഭിനയിക്കാന് അവസരം ലഭിച്ചിട്ടില്ല. ദക്ഷിണേന്ത്യന് സിനിമയില് ഒരു നടിയുടെ യാത്ര വളരെ ബുദ്ധിമുട്ടേറിയതാണ്. അവള് ഒറ്റയ്ക്ക് തന്നെ പോരാടണം എന്നാണ് ജ്യോതിക പറയുന്നത്.
പുരുഷ താരങ്ങള്ക്ക് പ്രായമാകുന്നത് സ്വീകാരിക്കപ്പെടുമ്പോള്, നടിമാര്ക്ക് പ്രായമാവുന്നത് ആളുകള് അംഗീകരിക്കില്ല എന്ന ചര്ച്ചയോടാണ് ജ്യോതിക പ്രതികരിച്ചത്. ”28-ാം വയസില് എനിക്ക് കുട്ടികളുണ്ടായി. അതിന് ശേഷം വ്യത്യസ്തമായ വേഷങ്ങളാണ് ലഭിച്ചു കൊണ്ടിരുന്നത്. 28-ന് ശേഷം ഒരു താരത്തിനോ ഹീറോയ്ക്കോ ഒപ്പം അഭിനയിച്ചിട്ടില്ല.”
”പുതിയ സംവിധായകര്ക്കൊപ്പം സ്വന്തമായി കരിയര് നിര്മ്മിക്കുക എന്നത് വലിയ വെല്ലുവിളിയാണ്. തമിഴ് സിനിമയില് മാത്രമല്ല, ദക്ഷിണേന്ത്യന് സിനിമയിലാകെ ഈ പ്രവണതയുണ്ട്. സ്ത്രീകള്ക്ക് വേണ്ടിയുള്ളതോ അവര്ക്ക് പ്രാധാന്യമുള്ളതോ ആയ സിനിമകള് ചെയ്യാന്, പണ്ടത്തെ പോലെ കെ. ബാലചന്ദ്രനെപ്പോലെയുള്ള വലിയ, അനുഭവസമ്പത്തുള്ള സിനിമ സംവിധായകര് നമുക്കിപ്പോഴില്ല.”
”വലിയ നടന്മാര്ക്ക് വേണ്ടി വലിയ സിനിമകളുണ്ടാക്കുന്ന സംവിധായകരാണുള്ളത്. സ്ത്രീ അഭിനേതാക്കള്ക്ക് വേണ്ടി സിനിമ എടുക്കുന്ന വലിയ സംവിധായകര് ഇന്നില്ല. ദക്ഷിണേന്ത്യന് സിനിമയില് ഒരു നടിയുടെ യാത്ര വളരെ ബുദ്ധിമുട്ടേറിയതാണ്. അവള് ഒറ്റയ്ക്ക് പോരാടുന്ന യുദ്ധമാണത്” എന്നാണ് ജ്യോതിക പറയുന്നത്.
അതേസമയം, ടബ്ബ കാര്ട്ടല് എന്ന ഹിന്ദി വെബ് സീരിസ് ആണ് ജ്യോതികയുടെതായി ഇപ്പോള് പുറത്തിറങ്ങിയിരിക്കുന്നത്. ‘ശെയ്ത്താന്’, ‘ശ്രികാന്ത്’ എന്നീ ബോളിവുഡ് ചിത്രങ്ങള്ക്ക് ശേഷം ജ്യോതിക അഭിനയിച്ച ഹിന്ദി വെബ് സീരിസ് ആണിത്. നിമിഷ സജയന്, ഗജ്രാജ് റാവോ, ശാലിനി പാണ്ഡേ, ലില്ലിത് ഡൂബേ, അഞ്ജലി ആനനന്ദ്, സായ് ടാംഹങ്കര്, ജിഷു സെന്ഗുപ്ത, ഭൂപേന്ദ്ര സിങ് ജടാവത് എന്നിവരാണ് സീരിസിലെ പ്രധാന താരങ്ങള്.