സിനിമയിലെ ആരും തന്നോട് മോശമായി പെരുമാറിയിട്ടില്ലെന്ന് നടിയും ‘അമ്മ’ എക്സിക്യൂട്ടീവ് അംഗവുമായ ജോമോള്. ഇതുവരെ ആരും വാതിലില് മുട്ടുകയോ അഡ്ജസ്റ്റ്മെന്റ് വേണമെന്ന് ആവശ്യപ്പെടുകയോ ചെയ്തിട്ടില്ല എന്നാണ് ജോമോള് പറയുന്നത്. ഹേമ കമ്മിറ്റി റിപ്പോര്ട്ടില് പ്രതികരിക്കവെയാണ് ജോമോള് സംസാരിച്ചത്.
”എന്നോട് ഇതുവരെയാരും മോശമായി സംസാരിച്ചിട്ടില്ല. ഞാന് എത്രയോ കാലമായി സിനിമയില് അഭിനയിക്കുന്നു. ഇന്നേ വരെ അത്തരം അനുഭവമുണ്ടായിട്ടില്ല. നിങ്ങള് പറയുന്നത് പോലെ കതകില് വന്ന് തട്ടുകയോ അല്ലെങ്കില് സഹകരിച്ചാല് മാത്രമേ സിനിമയില് അഭിനയിക്കാന് അവസരമുള്ളൂവെന്ന് എന്നോടാരും പറഞ്ഞിട്ടില്ല.”
”പ്രമുഖ നടിയെ സിനിമയില് നിന്നും മാറ്റി നിര്ത്തിയെന്ന് പറഞ്ഞു. സിനിമയില് ഇപ്പോഴും അവര് അഭിനയിക്കുന്നുണ്ട്. ഒരു സംവിധായകന്റെയോ എഴുത്തുകാരന്റെയോ ക്രിയേറ്റിവിറ്റിയെ നമുക്ക് ചോദ്യം ചെയ്യാന് കഴിയില്ല. അതില് ഇടപെടാനാവില്ല. ഇത്തരം മോശപ്പെട്ട അനുഭവങ്ങള് ഉള്ളവര് പരാതിയുമായി വന്നാല് അവര്ക്കൊപ്പം നില്ക്കും.”
”മലയാള സിനിമാ മേഖലയെ കുറിച്ചുള്ള ആരോപണങ്ങള് പത്രത്തില് വന്നത് മാത്രമാണ് കേട്ടിട്ടുള്ളത്. അല്ലാതെ പരാതിയുമായി ആരും വന്നിട്ടില്ല” എന്നാണ് ജോമോള് പറയുന്നത്. അതേസമയം, ‘അമ്മ’ സംഘടന ഹേമാ കമ്മിറ്റി റിപ്പോര്ട്ടിനെ സ്വാഗതം ചെയ്യുന്നു എന്നാണ് ജനറല് സെക്രട്ടറിയായ സിദ്ദിഖ് പ്രതികരിച്ചത്.