പഴയ ആര്.സി.100 ബൈക്ക് സ്റ്റണ്ട് ചെയ്യുന്ന ജോജു ജോര്ജിന്റെ ചിത്രം സോഷ്യല് മീഡിയയില് വൈറലായിരുന്നു. “പീസ്” എന്ന പുതിയ ചിത്രത്തിന്റെ ലൊക്കേഷനില് നിന്നുള്ള ചിത്രമാണ് ആരാധകര് ഏറ്റെടുത്തത്. കാര്ലോസ് എന്ന കഥാപാത്രമായുള്ള ചിത്രത്തിലെ താരത്തിന്റെ വ്യത്യസ്ത ഗെറ്റപ്പും വൈറലാവുകയാണ്.
ചെറുപ്പം മുതലേ ബൈക്ക് സ്റ്റണ്ട് നടത്തി വന്ന ആളാണ് താന് എന്നാണ് ജോജു പറയുന്നത്. ചെറുപ്പത്തില് മാളയില് കൂട്ടുകാരുടെ കൂടെ ഇതുപോലെ ബൈക്ക് സ്റ്റണ്ട് ചെയ്യുമ്പോള് ആളുകള് ഒന്നും കൊള്ളാത്തവര് എന്നായിരുന്നു തങ്ങളെ വിളിച്ചിരുന്നത് എന്ന് താരം പറയുന്നു.
ഒരുപാട് കാലത്തിന് ശേഷമാണ് ഇതൊക്കെ ചെയ്യുന്നത്. ചെറുപ്പത്തില് ചെയ്തത് കൊണ്ടാണ് ഇപ്പോഴും ചെയ്യാനാകുന്നത്. ജീവിതം ആഘോഷമാകുന്ന പ്രായമുള്ള ഫ്രീക്കന് എന്നാണ് കാര്ലോസ് എന്ന കഥാപാത്രത്തെ കുറിച്ച് ജോജു മനോരമയോട് പറയുന്നത്.
സന്ഫീര് കെ. സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് തൊടുപുഴയില് പുരോഗമിക്കുകയാണ്. സഫര് സനല് ആണ് ചിത്രത്തിന്റെ കഥ, തിരക്കഥ, സംഭാഷണം. സിദ്ദീഖ്, ഷാലു റഹീം, വിജിലേഷ്, ആശാ ശരത്ത്, ലെന, അതിഥി രവി തുടങ്ങിയ താരങ്ങള് ചിത്രത്തില് അണിനിരക്കുന്നുണ്ട്.