എസ് എസ് രാജമൗലി ഒരുക്കിയ ബ്രഹ്മാണ്ഡ ചിത്രം ബാഹുബലിയിൽ പ്രതിനായകനായ ബല്ലാൽ ദേവനായി ആദ്യം പരിഗണിച്ചിരുന്നത് ഹോളിവുഡ് താരം ജേസൺ മോമയെ ആയിരുന്നുവെന്ന് റാണ ദഗുബാട്ടി.
മോഡേൺ മാസ്റ്റേഴ്സ്: എസ്.എസ് രാജമൗലി എന്ന നെറ്റ്ഫ്ലിക്സ് ഡോക്യുമെന്ററിയിലാണ് റാണ ദഗുബാട്ടി ഇക്കാര്യം വെളിപ്പെടുത്തിയത്. അക്വാമാൻ, ഗെയിം ഓഫ് ത്രോൺസ് എന്നിവയിലൂടെ പ്രശസ്തനാണ് ജേസൺ മോമ.
“സിനിമയിലെ വില്ലൻ കഥാപാത്രത്തിനായി അക്വാമാനിലൂടെ ശ്രദ്ധേയനായ ഹോളിവുഡ് താരം ജേസൺ മോമയെ സമീപിക്കാൻ ശ്രമിച്ചിരുന്നു. ഇത് ഒരു പീരിയോഡിക് ചിത്രമാണ് എന്നും ഇതിലെ പ്രധാന വില്ലൻ കഥാപാത്രമായി തന്നെ പരിഗണിക്കുന്നതായും നിർമ്മാതാവ് പറഞ്ഞു.
കഥ കേട്ട ശേഷം താൻ അദ്ദേഹത്തോട് ചോദിച്ചു, ‘എൻ്റെ അടുത്തേക്ക് വരുന്നതിന് മുമ്പ് ഏത് നടനെയാണ് നിങ്ങൾ ഇതിലേക്ക് സമീപിച്ചത്’ എന്ന്. അക്വാമാൻ സ്റ്റാർ ജേസൺ മോമയെ ഈ കഥാപാത്രത്തിനായി സമീപിക്കാൻ ശ്രമിച്ചിരുന്നുവെന്ന് അറിഞ്ഞപ്പോൾ ഞാൻ ആശ്ചര്യപ്പെട്ടു പോയി, ഒരു അന്താരാഷ്ട്ര താരത്തിന് ശേഷം രണ്ടാമതായി പരിഗണിക്കപ്പെട്ടതിൽ എനിക്ക് വലിയ സന്തോഷമുണ്ട്.” റാണ ദഗുബാട്ടി പറയുന്നു.