അധികം സിനിമകളില് അഭിനയിച്ചിട്ടില്ലെങ്കിലും മലയാളി പ്രേക്ഷകര്ക്ക് ഏറെ പരിചിതമായ മുഖമാണ് ഹന്ന റെജി കോശിയുടെത്. കഴിഞ്ഞ വര്ഷം പുറത്തിറങ്ങിയ ‘കൂമന്’ എന്ന സിനിമയിലെ താരത്തിന്റെ പ്രകടനം ഏറെ ശ്രദ്ധ നേടിയിരുന്നു. മോഡലിംഗില് സജീവമായ ഹന്ന 2016ല് ‘ഡാര്വിന്റെ പരിണാമം’ എന്ന ചിത്രത്തിലൂടെയാണ് സിനിമയില് എത്തിയത്.
എന്നാല് മോഡലിംഗിന് പോവുകയോ സിനിമയില് അഭിനയിക്കുകയോ ഒന്നും തന്റെ പിതാവിന് താല്പര്യമുള്ള കാര്യമല്ലായിരുന്നു എന്ന് തുറന്നു പറഞ്ഞിരിക്കുകയാണ് ഹന്ന ഇപ്പോള്. ”സാധാരണ അച്ഛനമ്മമാര് ചിന്തിക്കുന്നത് പോലെ തന്നെയായിരുന്നു എന്റെ വീട്ടിലും.”
”പപ്പയ്ക്ക് ഞാന് മാസ്റ്റേഴ്സ് എടുത്ത് ജോലി, കല്യാണം അങ്ങനെയൊക്കെ പോകുന്നതായിരുന്നു താല്പര്യം. സിനിമാ മേഖലയ്ക്ക് ഒരു സ്ഥിരത ഇല്ലല്ലോ, എന്താണ് എപ്പോഴാണ് സംഭവിക്കുന്നത് എന്നറിയില്ല. മോഡലിംഗോ സിനിമയോ ഒന്നും അച്ഛന്റെ ചിന്തയില് പോലും ഇല്ലായിരുന്നു.”
”പപ്പ എന്നെ സ്ലീവ്ലെസ് ഇടാന് പോലും സമ്മതിക്കില്ലായിരുന്നു. മോഡലിംഗ് എന്റെ മാത്രം പാഷനായിരുന്നു. ബിക്കിനി റാംപ് വാക്കിന് പോയപ്പോള് പോലും ഞാന് പപ്പയോട് പറഞ്ഞില്ല. അമ്മയോട് പറഞ്ഞു, പോയി. പിന്നെ എന്റെ ഇഷ്ടം അവരും അംഗീകരിച്ചു, സിനിമയും അങ്ങനെത്തന്നെ” എന്നാണ് ഹന്ന സ്റ്റാര് ആന്ഡ് സ്റ്റൈലിന് നല്കിയ അഭിമുഖത്തില് പറയുന്നത്.
അതേസമയം, ‘എ രഞ്ജിത്ത് സിനിമ’ ആയിരുന്നു ഹന്നയുടെതായി ഒടുവില് തിയേറ്ററില് പുറത്തിറങ്ങിയ ചിത്രം. ഇനി രണ്ട് സിനിമകളും സീരിസുകളും ഹന്നയുടെതായി ഒരുങ്ങി കൊണ്ടിരിക്കുന്നത്. ‘ഡിഎന്എ’ എന്ന ചിത്രം ജനുവരിയില് റിലീസ് ചെയ്യും.