മമ്മൂട്ടിയുടെ കോമഡി ആക്ഷന് ചിത്രം ‘രാജമാണിക്യം’ പോലെ രസകരമായ മുഹൂര്ത്തങ്ങളുള്ള സിനിമയാണ് ‘ആവേശം’ എന്ന് ഫഹദ് ഫാസില്. എന്നാല് രാജമാണിക്യം പോലെയൊരു സിനിമയല്ല. ചിത്രം കണ്ടവരെല്ലാം താന് വളരെ ഓവറാണെന്ന് പറഞ്ഞു എന്നാണ് ഫഹദ് ഇപ്പോള് പറയുന്നത്.
”ഞാന് ആദ്യമായാണ് ഇതുപോലൊരു ചിത്രം ചെയ്യുന്നത്. എന്റെ വിശ്വാസത്തില് ജിത്തുവും സുഷിനും ബാക്കിയുള്ള എല്ലാവരും അങ്ങനെ തന്നെയാണ്. അതുകൊണ്ട് ഈ സിനിമയെ പറ്റി പെട്ടെന്ന് ചോദിക്കുമ്പോള് പറയാന് പേടിയാണ്. എന്തു പറയണം എന്തൊക്കെ പറയണ്ട എന്നറിയില്ല.”
”പിന്നെ ഉറപ്പിച്ചു പറയാന് കഴിയുന്ന ഒരു കാര്യം, ഈ പടം കാണാന് വളരെ എക്സൈറ്റ്മെന്റാകും എന്നാണ്. അതിന് ഞാന് ഗ്യാരണ്ടി തരാം. എല്ലാ സീനിലും വലിയ എനര്ജിയുള്ള സിനിമയാണ്. ആവേശം കണ്ട എല്ലാവരും പറഞ്ഞത് ഞാന് നല്ല ഓവറാണെന്നാണ്. മമ്മൂട്ടിയുടെ രാജമാണിക്യം പോലെ രസകരമായ മുഹൂര്ത്തങ്ങള് ഈ സിനിമയിലുണ്ട്.”
”രാജമാണിക്യം പോലൊരു സിനിമയാണോ ആവേശമെന്ന് പറയാനാകില്ല” എന്നാണ് ഫഹദ് പറയുന്നത്. അതേസമംയ, ബെംഗളൂരു സ്വദേശിയായ രംഗ എന്ന ഡോണിനെയാണ് ഫഹദ് ഫാസില് ചിത്രത്തില് അവതരിപ്പിക്കുന്നത്. നാളെ റിലീസ് ചെയ്യാനിരിക്കുന്ന ചിത്രം ഗംഭീര അഡ്വാന്സ് ബുക്കിംഗ് ആണ് നേടിയിരിക്കുന്നത്.
‘രോമാഞ്ചം’ എന്ന സൂപ്പര് ഹിറ്റ് ചിത്രത്തിന് ശേഷം ജിത്തു മാധവന് സംവിധാനം ചെയ്യുന്ന ചിത്രമാണിത്. അന്വര് റഷീദ് എന്റര്ടൈന്മെന്റ്സ്, ഫഹദ് ഫാസില് ആന്ഡ് ഫ്രണ്ട്സിന്റെ ബാനറില് അന്വര് റഷീദ്, നസ്രിയ നസിം എന്നിവര് ചേര്ന്നാണ് ചിത്രം നിര്മിക്കുന്നത്.