ജിതു മാധവൻ സംവിധാനം ചെയ്ത ഫഹദ് ഫാസിൽ ചിത്രം ‘ആവേശം’ തിയേറ്ററുകളിലെ ഗംഭീര വിജയത്തിന് ശേഷം ഒടിടിയിൽ സ്ട്രീമിംഗ് ആരംഭിച്ചിരിക്കുകയാണ്. ഫഹദിന്റെ കരിയറിലെ തന്നെ ഏറ്റവും മികച്ച കഥാപാത്രങ്ങളിലൊന്നായാണ് ആവേശത്തിലെ രംഗയെ പ്രേക്ഷകരും നിരൂപകരും കണക്കാക്കുന്നത്. ഫഹദിനൊപ്പം തന്നെ ഏറ്റവും കൂടുതൽ ചർച്ച ചെയ്യപ്പെട്ട കഥാപാത്രമാണ് സജിൻ ഗോപു അവതരിപ്പിച്ച രംഗണ്ണന്റെ വലംകൈയായ അമ്പാൻ. രോമാഞ്ചം എന്ന ജിതു മാധവന്റെ ആദ്യ ചിത്രത്തിലെ നിരൂപ് എന്ന കഥാപാത്രവും സജിൻ ഗോപുവിന്റെ ശ്രദ്ധേയമായ വേഷമായിരുന്നു.
ഒടിടി റിലീസിന് ശേഷവും നിരവധി ആളുകളാണ് രംഗയെയും അമ്പാനെയും പ്രശംസിച്ച് രംഗത്തെത്തുന്നത്. ഇപ്പോഴിതാ ഒരഭിമുഖത്തിൽ സജിൻ ഗോപുവിനെ കുറിച്ച് ഫഹദ് ഫാസിൽ പറഞ്ഞ വാക്കുകളാണ് സോഷ്യൽ മീഡിയയിൽ ചർച്ചയാവുന്നത്. ആവേശത്തിന് രണ്ടാം ഭാഗം താൻ ചെയ്യാൻ ആഗ്രഹിക്കുന്നുണ്ടെങ്കിൽ അതിന്റെ പ്രധാന കാരണങ്ങളിലൊന്ന് സജിൻ ഗോപുവിന്റെ കൂടെ കൂടുതൽ സീൻ ചെയ്യാൻ വേണ്ടായിയാണെന്നാണ് ഫഹദ് പറയുന്നത്.കൂടാതെ സജിൻ ഗോപുവിന്റെ പ്രകടനത്തെയും ഫഹദ് പ്രശംസിക്കുന്നുണ്ട്.
“ഈ സിനിമയുടെ സെക്കന്റ് പാർട്ട് ചെയ്യാൻ എനിക്ക് ആഗ്രഹം തോന്നുന്നുണ്ടെങ്കിൽ അതിന്റെ ഒറ്റ കാരണം എനിക്ക് അദ്ദേഹത്തിനൊപ്പം കൂടുതൽ സീൻ ചെയ്യാൻ വേണ്ടിയാണ്. I love him, what a guy.” എന്നാണ് ഫഹദ് പറഞ്ഞത്.
അതേസമയം ബംഗളുരുവിലെ ഒരു കോളേജ് പശ്ചാത്തലത്തിലുള്ള 3 മലയാളി വിദ്യാർത്ഥികളുടെ കഥയും ശേഷം അവർ നേരിടുന്ന ചില പ്രശ്നങ്ങൾക്ക് രംഗ എന്ന ലോക്കൽ ഗുണ്ടാ നേതാവിന്റെ സഹായം തേടുന്നതും തുടർന്നുള്ള രസകരമായ സംഭവ വികാസങ്ങൾ ബ്ലാക്ക് ഹ്യൂമറിന്റെയും ഗ്യാങ്ങ്സ്റ്റർ സ്പൂഫിന്റെയും പശ്ചാത്തലത്തിൽ പറയുന്നതുമാണ് ആവേശത്തിന്റെ പ്രമേയം.
അൻവർ റഷീദ് എന്റർടൈൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സിന്റെ ബാനറിൽ അൻവർ റഷീദ്, നസ്രിയ നസിം എന്നിവർ ചേർന്നാണ് ചിത്രം നിർമിക്കുന്നത്. ജിതു മാധവൻ തന്നെയാണ് ചിത്രത്തിന് തിരക്കഥ രചിച്ചിരിക്കുന്നത്.