സമ്മിശ്രപ്രതികരണങ്ങളാണ് ലഭിക്കുന്നത് എങ്കിലും ബോക്‌സ് ഓഫീസില്‍ ഗംഭീര പ്രകടനം നടത്തുകയാണ് ‘ഇന്ത്യന്‍ 2’. ഓപ്പണിങ് ദിനത്തില്‍ 26 കോടി രൂപയാണ് ചിത്രം നേടിയത്. ഇന്ത്യന്‍ 2വിന് പിന്നാലെ രാം ചരണിനെ നായകനാക്കി ഒരുക്കുന്ന ‘ഗെയിം ചേഞ്ചര്‍’ എന്ന ചിത്രമാണ് ശങ്കറിന്റെതായി തിയേറ്ററില്‍ എത്താന്‍ പോകുന്നത്. ഇതിന് ശേഷം ‘ഇന്ത്യന്‍ 3’യും ശങ്കര്‍ ഒരുക്കും.
ആ ചിത്രവും പൂര്‍ത്തിയാകുന്നതോടെ ശങ്കര്‍ ഇനിയൊരു ചരിത്ര സിനിമ ഒരുക്കും എന്നാണ് റിപ്പോര്‍ട്ടുകള്‍. തമിഴ്‌നാട്ടില്‍ നിന്നുള്ള പ്രമുഖ സാഹിത്യകാരനും സിപിഐഎം എംപിയുമായ സു വെങ്കിടേശന്റെ നോവല്‍ ‘വേല്‍പാരി’ സിനിമയാക്കാന്‍ ഒരുങ്ങുകയാണ് ശങ്കര്‍. ഒരു അഭിമുഖത്തിനിടെയാണ് സംവിധായകന്‍ ഇക്കാര്യം വെളിപ്പെടുത്തിയത്.
2000 കൊല്ലം മുമ്പുള്ള തമിഴ്‌നാട്ടിനെ കുറിച്ചാണ് വേല്‍പാരി പറയുന്നത്. സംഗ കാലത്തിന്റെ അവസാനം തമിഴകത്തെ പരമ്പു എന്ന നാട് വാണ ഭരണാധികാരി പാരി വല്ലാലിന്റെ കഥയും പോരാട്ടവുമാണ് നോവല്‍ പറയുന്നത്. തമിഴ് നാടോടിപ്പാട്ടുകളില്‍ നിന്നാണ് സു വെങ്കിടേശന്‍ ഈ നോവല്‍ രചിച്ചത്.
”ഞാന്‍ എടുത്താല്‍ നന്നാകും എന്ന് പലരും പറഞ്ഞ നോവലാണ് വേല്‍പാരി. എന്നാല്‍ എനിക്ക് അത് വായിക്കാന്‍ സമയം കിട്ടിയിരുന്നില്ല. ഒന്നോ രണ്ടോ പേജ് വായിക്കാന്‍ സാധിച്ചിരുന്നു. എന്നാല്‍ കോവിഡ് കാലത്ത് ഏറെ സമയം കിട്ടിയപ്പോള്‍ വായന വീണ്ടും തുടങ്ങി. ഒരോ പേജ് കഴിയും തോറും ഇമേജ് എനിക്ക് ലഭിച്ചു തുടങ്ങി.”
”എന്നെ ഏറെ ആകര്‍ഷിച്ചു. നോവല്‍ തീര്‍ന്നപ്പോള്‍ ഞാന്‍ സു വെങ്കിടേഷിനെ വിളിച്ച് അതിന്റെ അവകാശം വാങ്ങി. മൂന്ന് ഭാഗങ്ങളാക്കിയുള്ള അതിന്റെ തിരക്കഥ ഞാന്‍ തയ്യാറാക്കി വച്ചിട്ടുണ്ട്. വലിയ ചിത്രമായതിനാല്‍ കൊറോണ കഴിഞ്ഞയുടന്‍ അത് ആരംഭിക്കാന്‍ സാധിക്കുന്ന ഒന്നായിരുന്നില്ല. എന്നാല്‍ അത് വരും” എന്നാണ് ശങ്കര്‍ പറയുന്നത്.