കമലിന്റെ സംവിധാനത്തില് എത്തിയ ‘നിറം’, മലയാള സിനിമയില് മാറ്റങ്ങള്ക്ക് തുടക്കം കുറിച്ച ചിത്രമായിരുന്നു. 1999ല് പുറത്തിറങ്ങിയ നിറത്തില് ആണ്-പെണ് സൗഹൃദങ്ങളുടെ കഥയാണ് പറഞ്ഞത്. കുഞ്ചാക്കോ ബോബനും ശാലിയും ജോടികളായി എത്തിയ ചിത്രം സൂപ്പര് ഹിറ്റ് ആവുകയും ചെയ്തിരുന്നു. ചിത്രത്തിന്റെ നായികയുടെ ഓഡിഷനില് എത്തിയ ഒരു പെണ്കുട്ടി സൂപ്പര് താരമായി മാറിയ കഥയാണ് സംവിധായകന് കമല് ഇപ്പോള് പങ്കുവച്ചിരിക്കുന്നത്.
”നിറത്തില് നായികയെ തേടിയുള്ള ഓഡിഷന് വന്നതില് എനിക്കേറെ ഇഷ്ടപ്പെട്ട ഒരു കുട്ടി പിന്നീട് കമല് ഹാസന്റെയും ആമിര് ഖാന്റെയും ഒക്കെ നായികയായി വളര്ന്നു വലിയ താരമായി. അസിന് തോട്ടുങ്കല്. ഓഡിഷന് സമയത്ത് വല്ലാതെ കണ്ണു ചിമ്മുന്നതായിരുന്നു അസിന്റെ കുഴപ്പം. ക്ലോസപ്പ് ഷോട്ടുകളെ അത് ബാധിക്കുമെന്ന് തോന്നിയത് കൊണ്ടാണ് അസിനെ ഒഴിവാക്കിയത്.”
”പിന്നീടൊരിക്കല് എയര്പോര്ട്ടില് വച്ചു കണ്ടപ്പോള് അസിനോട് ഞാന് ഇക്കാര്യം പറഞ്ഞു. അപ്പോഴേക്കും അവര് ബോളിവുഡിലെ തിരക്കുള്ള നടിയായി കഴിഞ്ഞിരുന്നു. ഞാന് ചൂണ്ടിക്കാണിച്ച ന്യൂനത മനസിലായതായും പിന്നീട് പങ്കെടുത്ത ഓഡിഷനുകളില് അതു പരിഹരിക്കാന് കഴിഞ്ഞതായും അസിന് പറഞ്ഞു” എന്നാണ് വനിത മാഗസിന് നല്കിയ അഭിമുഖത്തില് കമല് പറയുന്നത്.
അതേസമയം, ശാലിനി ആദ്യം സിനിമ റിജക്ട് ചെയ്തിരുന്നതായും കമല് പറയുന്നുണ്ട്. ഒരു തമിഴ് സിനിമയ്ക്ക് ഡേറ്റ് നല്കിയതിനാല് ശാലിനി ഈ ചിത്രത്തില് അഭിനയിക്കാനുണ്ടാവില്ല എന്നായിരുന്നു നടിയുടെ അച്ഛന് ബാബു ആദ്യം പറഞ്ഞത്. ഇതോടെ പുതുമുഖങ്ങളെ തേടാനായി പത്രപരസ്യം നല്കി. എന്നാല് കുഞ്ചാക്കോയ്ക്കൊപ്പം പിടിച്ചു നില്ക്കാന് പറ്റിയ ആരും ഉണ്ടായിരുന്നില്ല.
അങ്ങനെ നായികയെ കിട്ടാതെ വിഷമിച്ചിരിക്കുമ്പോഴാണ് ഭാഗ്യം വീണ്ടും ശാലിനിയുടെ രൂപത്തില് വരുന്നത്. ശാലിനിയുടെ തമിഴ് സിനിമ മാറ്റിവച്ചു. ഫോണിലൂടെ കഥ പറഞ്ഞപ്പോള് അവര്ക്ക് ഇഷ്ടമായി. അങ്ങനെ സിനിമയില് ശാലിനി തന്നെ നായികയായി എന്നും കമല് വ്യക്തമാക്കി.