താന് ഇതുവരെയും ഒരു സൂപ്പര് താരത്തിന്റെ ഡേറ്റിന് പോലും കാത്തു നിന്നിട്ടില്ലെന്ന് സംവിധായകന് ജോഷി. മമ്മൂട്ടിയുടെയും മോഹന്ലാലിന്റെയും ഡേറ്റ് കിട്ടാത്തതു കൊണ്ടാണ് തന്റെ സിനിമകളില് ജോജുവും ദിലീപുമൊക്കെ നായകന്മാരായത് എന്ന സംസാരം സിനിമാ മേഖലയില് ഉണ്ടായിരുന്നതായും ജോഷി പറയുന്നു.
ഇക്കാലത്തിനിടയ്ക്ക് ഒരു സൂപ്പര്താരത്തിന്റെയും ഡേറ്റിന് വേണ്ടി കാത്തുനിന്നിട്ടില്ല. ഒരു നടനെയും ആശ്രയിച്ചല്ല താന് ഉയര്ന്നു വന്നതും. ‘പൊറിഞ്ചു മറിയം ജോസ്’ ചെയ്തപ്പോള് സിനിമാ മേഖലയില് അതിനെ കുറിച്ച് ഒരു സംസാരം ഉണ്ടായിരുന്നു.
മമ്മൂട്ടിയുടെയും മോഹന്ലാലിന്റെയും ഡേറ്റ് കിട്ടാത്തതു കൊണ്ടാണ് ജോഷി, ജോജുവിനെ വച്ച് പടം ചെയ്യുന്നതെന്ന്. ദിലീപിനെ വച്ച് ‘റണ്വേ’ ചെയ്തപ്പോഴും ഇങ്ങനെയൊക്കെ ആയിരുന്നു പറഞ്ഞത്. മമ്മൂട്ടിയും മോഹന്ലാലും നാല്പ്പതിലേറെ വര്ഷമായി സിനിമയിലുണ്ട്.
അപാരമായ അഭിനയ സിദ്ധി കൊണ്ട് മാത്രമല്ല ഇന്നും അവര് സിനിമയില് തുടരുന്നത്. ജോലിയോടുള്ള സമര്പ്പണത്തിന്റെ ഫലം കൂടിയാണത് എന്നാണ് ജോഷി മാതൃഭൂമിക്ക് നല്കിയ അഭിമുഖത്തില് പറയുന്നത്. ഇതിനൊപ്പം പൊതുപരിപാടികളില് പ്രത്യക്ഷപ്പെടാത്തതിനെ കുറിച്ചും സംവിധായകന് പറയുന്നുണ്ട്.
തനിക്ക് പ്രസംഗിക്കാനുള്ള കഴിവില്ല. ഒരു വേദിയില് കയറി വെറുതെ നന്ദി, നമസ്കാരം എന്ന് പറഞ്ഞു പോകുന്നതില് താല്പര്യം ഇല്ലാത്തതു കൊണ്ട് പ്രസംഗ വേദികളില് തന്നെ കാണാനാവില്ല. ഷൂട്ടിംഗ് സ്ഥലത്ത് പോലും താന് മൈക്ക് ഉപയോഗിക്കാറില്ല. തന്റെ ശബ്ദം അത്ര പോലും പുറത്ത് കേള്ക്കുന്നത് ഇഷ്ടമല്ലെന്നാണ് സംവിധായകന് പറയുന്നത്.