സിനിമയില്‍ അരങ്ങേറ്റം കുറിച്ചിട്ടില്ലെങ്കിലും ദിലീപിന്റെയും മഞ്ജു വാര്യരുടെയും മകളായ മീനാക്ഷിക്ക് താരപരിവേഷം ലഭിച്ചിട്ടുണ്ട്. മീനാക്ഷിയുടെ സോഷ്യല്‍ മീഡിയ പോസ്റ്റുകള്‍ വാര്‍ത്തകളില്‍ ഇടം നേടാറുമുണ്ട്. മീനാക്ഷി ഡോക്ടറായി പ്രാക്റ്റീസ് തുടങ്ങിയതില്‍ സന്തോഷം പങ്കുവച്ച് എത്തിയിരിക്കുകയാണ് ദിലീപ് ഇപ്പോള്‍.
താന്‍ എടുത്തു നടന്ന മകള്‍ സര്‍ജറി ചെയ്യുന്ന ചിത്രങ്ങള്‍ അയച്ച് തരുമ്പോള്‍ മനസിലുണ്ടാകുന്ന വികാരം പറഞ്ഞറിയിക്കാനാകില്ല എന്നാണ് ദിലീപ് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ പറയുന്നത്. കുടുംബത്തില്‍ ആരും തിരഞ്ഞെടുക്കാത്ത ഒരു മേഖലയിലേക്ക് കടന്നു ചെല്ലുമ്പോള്‍ മീനാക്ഷിക്ക് വഴികാട്ടാന്‍ ആരും ഉണ്ടായിരുന്നില്ല.
അവള്‍ എല്ലാം ഒറ്റയ്ക്കാണ് നേടിയത്. പ്ലസ് ടു കാലഘട്ടത്തിലാണ് മീനാക്ഷി ജീവിതത്തിലെ ഏറ്റവും വലിയ ട്രോമ അനുഭവിക്കുന്നത്, എന്നാല്‍ അതെല്ലാം തരണം ചെയ്ത് നല്ല മാര്‍ക്ക് നേടിയാണ് മീനാക്ഷി മെഡിസിന് പ്രവേശനം നേടുന്നത്, ആ സംഭവം മകളോട് ബഹുമാനം തോന്നിപ്പിച്ചു എന്നാണ് ദിലീപ് പറയുന്നത്.
അതേസമയം, താനും മകളും തമ്മില്‍ അഭിപ്രായ വ്യത്യാസം ഉണ്ടാകാറുണ്ടെന്നും ദിലീപ് പറയുന്നുണ്ട്. ചില വാര്‍ത്തകള്‍ ഒക്കെ കാണുമ്പൊള്‍ എന്തിനാ അച്ഛാ ഇങ്ങനെ പറയുന്നത് എന്ന് മകള്‍ ചോദിക്കാറുണ്ട്. അപ്പോള്‍ ഞാന്‍ പറയും, അതൊക്കെ അങ്ങനെ നടക്കും ഞാന്‍ എന്തെല്ലാം കേള്‍ക്കുന്നുണ്ട് എന്ന്.
അഭിപ്രായ വ്യത്യാസങ്ങള്‍ പലപ്പോഴും ഉണ്ടാകാറുണ്ട്. പക്ഷെ നമ്മള്‍ ജീവിക്കുന്നത് തന്നെ മക്കള്‍ക്ക് വേണ്ടിയല്ലേ. എല്ലാ അച്ഛനും അമ്മയും അങ്ങനെയാണ്. മോളെ ഒരു കാര്യത്തിലും ഞാന്‍ ഉപേദശിക്കാറില്ല, മോള്‍ക്ക് എന്താണോ ഇഷ്ടം അതിനൊപ്പം നില്‍ക്കാനാണ് ശ്രമിക്കാറുള്ളത് എന്നും ദിലീപ് വ്യക്തമാക്കി.