ഒരു വര്ഷത്തില് എട്ടോളം സിനിമകളില് നായകനായി അഭിനയക്കാറുള്ള താരമാണ് ധ്യാന് ശ്രീനിവാസന്. എന്നാല് അഭിമുഖങ്ങളിലൂടെയാണ് താരം ഏറെ ശ്രദ്ധ നേടാറുള്ളത്. ധ്യാന് സംവിധാനം ചെയ്ത ‘ലവ് ആക്ഷന് ഡ്രാമ’ സിനിമയില് അച്ഛന് ശ്രീനിവാസന് അഭിനയിച്ചതിനെ കുറിച്ച് നടന് പറഞ്ഞ വാക്കുകളാണ് ഇപ്പോള് ശ്രദ്ധ നേടുന്നത്. തനിക്ക് സംംവിധായകന് ആകാന് ആഗ്രഹം തോന്നിയതിനെ കുറിച്ചടക്കം പറഞ്ഞു കൊണ്ടാണ് ധ്യാന് സംസാരിച്ചത്.
”അമ്മാവന് എം. മോഹനന് ആണ് ശരിക്കും എന്നെ സിനിമയില് എടുത്തത്. അദ്ദേഹം 916 എന്ന സിനിമ സംവിധാനം ചെയ്യുന്ന സമയം. അതില് അസിസ്റ്റന്റായി. അന്ന് മുതലാണ് സംവിധായകന് ആകണമെന്ന മോഹം വന്നു തുടങ്ങിയത്. ആ സിനിമയില് അനൂപ് മേനോന് ആയിരുന്നു നായകന്. അദ്ദേഹത്തെ കണ്ടപ്പോള് നായകനാകാനും തോന്നി.”
”ഞാന് സംവിധാനം ചെയ്യുന്ന സിനിമയില് അച്ഛന് അഭിനയിക്കണം എന്ന ആഗ്രഹം പറഞ്ഞപ്പോഴേ ഒരുപാട് ചോദ്യങ്ങളായിരുന്നു. ‘എന്താണു കഥ. ആരാണ് കഥാപാത്രം. എവിടെയാണ് ലൊക്കേഷന്, എന്നു ഷൂട്ടിങ് തുടങ്ങും, സ്ക്രിപ്റ്റ് എഴുതി തീര്ന്നെങ്കില് കാണിക്കൂ. ഞാനൊന്നു വായിക്കട്ടെ’ അങ്ങനെ അങ്ങനെ..”
”ഞാന് പറഞ്ഞു, ‘നയന്താരയാണ് നായിക. നയന്താരയുടെ അച്ഛനായി അഭിനയിക്കാന് പറ്റുമോ?’ അച്ഛന് പിന്നെ കഥയോ തിരക്കഥയോ ഒന്നും ചോദിച്ചില്ല. വളരെ പെട്ടെന്ന് മറുപടി പറഞ്ഞു, ഞാന് റെഡി” എന്നാണ് ധ്യാന് ഒരു അഭിമുഖത്തിനിടെ പറയുന്നത്. അതേസമയം, 2019ല് ആയിരുന്നു ധ്യാനിന്റെ സംവിധാനത്തില് ലവ് ആക്ഷന് ഡ്രാമ എത്തിയത്.