ബിഗ് സ്ക്രീനില് നിന്നു മിനിസ്ക്രീനിലെത്തി പ്രേക്ഷകരുടെ പ്രിയം നേടിയ താരമാണ് ധന്യ മേരി വര്ഗീസ്. വിവാഹത്തിനു ശേഷം അഭിനയരംഗത്ത് നിന്ന് വിട്ടുനിന്ന ധന്യയുടെ പേര് മലയാളി പിന്നീട് കേട്ടത് പണത്തട്ടിപ്പു കേസിലെ പ്രതിയെന്ന രീതിയിലായിരുന്നു. ആ സമയത്ത് ആത്മഹത്യയെ കുറിച്ച് പോലും ചിന്തിച്ചിരുന്നുവെന്ന് തുറന്നു പറഞ്ഞിരിക്കുകയാണ് ധന്യ. ആ സമയത്ത് തനിക്കും ഭര്ത്താവ് ജോണിനും പരസ്പരം പിന്തുണയ്ക്കാന് സാധിച്ചെന്നും ധന്യ പറഞ്ഞു.
“ഒന്നിച്ചു നില്ക്കാന് ദൈവം എന്നെയും ജോണിനെയും അനുഗ്രഹിച്ചു. പിന്നെ ഞങ്ങള് നന്നായി പ്രാര്ത്ഥിക്കുമായിരുന്നു. പ്രതീക്ഷിക്കാത്ത സമയത്താണ് പ്രശ്നങ്ങള് വരുന്നുത്. ഒന്ന് ഉറങ്ങി എഴുന്നേല്ക്കുമ്പോഴേക്കും വലിയ പ്രശ്നങ്ങള്. സ്വപ്നത്തില് വിചാരിക്കാത്ത കാര്യങ്ങളൊക്കെ നടന്നു. ആ സമയത്ത് ഞങ്ങള്ക്ക് പരസ്പരം പിന്തുണയ്ക്കാന് സാധിച്ചു. എനിക്ക് പുള്ളിയെ മനസ്സിലാക്കാന് പറ്റി, അതുപോലെ അദ്ദേഹം എന്റെ വിഷമങ്ങളും മനസ്സിലാക്കി. മറ്റ് എല്ലാവരേക്കാളും കൂടുതല് അദ്ദേഹത്തിന് പിന്തുണ നല്കാനായി.”
” ശരിക്കും ഞങ്ങള് ഒറ്റപ്പെട്ടിരുന്നു. ശരിക്കും ആ ഒരവസ്ഥ അനുഭവിക്കുന്നത് ഒരു അനുഗ്രഹം തന്നെയാണ്. കാരണം നമ്മള് കൂടുതല് ശക്തരാകും. ഇതെങ്ങനെ നേരിടാമെന്ന് ചിന്തിക്കും. നാളെ പുറത്തിറങ്ങി കഴിഞ്ഞാല് ആളുകളുടെ മുഖത്ത് എങ്ങനെ നോക്കും. ഇതൊക്കെ ഞാന് നേരിട്ടതാണ്. ഒരു നിമിഷമെങ്കിലും ആത്മഹത്യയെ കുറിച്ച് ചിന്തിച്ചിട്ടേയില്ല എന്നു പറയാനാകില്ല. ഞങ്ങള് രണ്ടു പേരും മാറി നിന്ന് ചിന്തിച്ചിട്ടുണ്ട്.” മഴവില് മനോരമയുടെ ഒന്നും ഒന്നും മൂന്നും വേദിയില് ധന്യ പറഞ്ഞു.