കണ്ണഞ്ചിക്കുന്ന പാർട്ടികളിലും അത്താഴവിരുന്നുകളിലുമെല്ലാം പങ്കെടുക്കുന്നവരാണ് ബോളിവുഡിലെ പല താരങ്ങളും. എന്നാൽ പലപ്പോഴും ഒരു മുഖം മാത്രം കാണാൻ സാധിക്കാറില്ല. അത് സൽമാൻ ഖാന്റെയാണ്. പുറത്തു നിന്ന് അത്താഴം കഴിച്ചിട്ട് 26 കൊല്ലത്തിലേറെയായി എന്ന് പറയുകയാണ് ബോളിവുഡ് താരം സൽമാൻ ഖാൻ. ഇന്ത്യാ ടുഡേയോടായിരുന്നു സൽമാന്റെ ഈ തുറന്നു പറച്ചിൽ.
സൽമാൻ ഖാൻ പലപ്പോഴും തനിച്ചാണ്. ഷൂട്ടിങ്ങുകൾക്കോ തന്റെ സിനിമകൾ പ്രൊമോട്ട് ചെയ്യാനോ സംസാരിക്കാനോ ഉള്ളപ്പോൾ മാത്രമാണ് അദ്ദേഹം പുറത്തിറങ്ങാറുള്ളത്. സൽമാൻ ഖാന്റെ സ്വകാര്യ ജീവിതം, ഒഴിവുസമയങ്ങളിൽ എങ്ങനെ ചിലവഴിക്കുന്നു, എന്ത് ഭക്ഷണമാണ് കഴിക്കുന്നത് എന്നിവയൊക്കെ ഒരു രഹസ്യമാണ്.
ഒരുപിടി സുഹൃത്തുക്കളെ ചുറ്റിപ്പറ്റിയുള്ള തന്റെ ജീവിതത്തെ കുറിച്ചും താരം ഇന്ത്യ ടുഡേയോട് പങ്കുവച്ചു. ’25, 26 വർഷമായി, അല്ലെങ്കിൽ അതിലേറെ കാലമായി വീട്ടിൽ നിന്ന് ഇറങ്ങി പുറത്ത് അത്താഴത്തിന് പോയിട്ടില്ല. ഷൂട്ടിന് മാത്രമാണ് ഞാൻ യാത്ര ചെയ്യാറുള്ളത്. ഫാമിലേക്ക് പോകുന്നതും പുൽത്തകിടിയിൽ ഇരിക്കുന്നതുമാണ് എന്റെ ഒരേയൊരു ഔട്ട്ഡോർ നിമിഷം’
‘ വീട്, ഷൂട്ട്, ഹോട്ടൽ, എയർപോർട്ട്, ലൊക്കേഷൻ, വീട്ടിലേക്ക്, പിന്നെ ജിമ്മിലേക്കാണ് എന്റെ യാത്ര. അത്രയേയുള്ളൂ. എന്റെ കുടുംബത്തേക്കാൾ കൂടുതൽ സമയം ഞാൻ എന്റെ സ്റ്റാഫിനൊപ്പം ചെലവഴിക്കുന്നു. ഞാൻ ഷോപ്പിംഗിന് പോലും പോകാറില്ല. അമ്മേയെയും കൂട്ടി ഞങ്ങൾ അടുത്തുള്ള റെസ്റ്റോറന്റിലേക്കോ മറ്റോ കാപ്പി കുടിക്കാൻ പോയതാണ് അടുത്ത കാലത്ത് പുറത്തു പോയ ഓർമ’ സൽമാൻ പറയുന്നു.
‘ഏക് താ ടൈഗർ’ (2012), ‘ടൈഗർ സിന്ദാ ഹേ’ (2017) എന്നിവയ്ക്ക് ശേഷം ടൈഗർ ഫ്രാഞ്ചൈസിയുടെ അടുത്ത ‘ടൈഗർ 3’യാണ് സൽമാൻ ഖാൻ നായകനായെത്തിയ പുതിയ ചിത്രം. കത്രീന കൈഫ്, ഇമ്രാൻ ഹാഷ്മി എന്നിവരാണ് മുഖ്യവേഷങ്ങളിലെത്തിയത്. 2012-ൽ പുറത്തിറങ്ങിയ ഏക്ഥാ ടൈഗർ, 2017-ലിറങ്ങിയ ടൈഗർ സിന്ദാ ഹേ എന്നീ ചിത്രങ്ങളുടെ തുടർച്ചയാണ് യഷ് രാജ് സ്പൈ യൂണിവേഴ്സിൽ ഉൾപ്പെട്ട ടൈഗർ 3.