സിനിമാ സംഘടനകള് നിസ്സഹകരണം പ്രഖ്യാപിച്ചതിനു പിറകെ താരസംഘടനയായ അമ്മയില് അംഗത്വം തേടുകയാണ് നടന് ശ്രീനാഥ് ഭാസി. ശ്രീനാഥ് ഭാസി, ഷെയ്ന് നിഗം എന്നിവരുമായി സഹകരിക്കില്ലെന്ന് 25 ന് നടന്ന സംയുക്ത യോഗത്തിനു ശേഷം നടത്തിയ വാര്ത്താസമ്മേളനത്തിലാണ് സിനിമാ സംഘടനാനേതാക്കള് വ്യക്തമാക്കിയത്.
ഇപ്പോഴിതാ ശ്രീനാഥ് ഭാസി അംഗത്വത്തിനായുള്ള അപേക്ഷ നല്കിയിട്ടുണ്ടെന്ന് അമ്മ എക്സിക്യൂട്ടീവ് കമ്മിറ്റി അംഗം ബാബുരാജ് പറഞ്ഞു. എക്സിക്യൂട്ടീവ് കമ്മിറ്റിയാണ് ഇത്തരം കാര്യങ്ങള് ചര്ച്ച ചെയ്യുകയും തീരുമാനമെടുക്കുകയും ചെയ്യുക. ജൂണ് 25 ന് സംഘടനയുടെ ജനറല് ബോഡിയാണ്. അതിന് മുന്പ് ഒരു കമ്മിറ്റി ഉണ്ടാവേണ്ടതാണ്.
അതിന്റെ തീയതി തീരുമാനിച്ചിട്ടില്ല. അതില് ഈ വിഷയം മുന്നോട്ട് വരും. പ്രൊഡ്യൂസേഴ്സ് അസോസിയേഷന്റെ സംയുക്തമായ തീരുമാനം ആണല്ലോ മൂന്ന് സിനിമ കഴിഞ്ഞവര് ഏതെങ്കിലും ഒരു സംഘടനയുടെ കീഴില് വരണം എന്നത്. നിര്മ്മാതാക്കളുടെ കരാറില് തന്നെ വ്യക്തികളുമായല്ല മറിച്ച് അവര്ക്ക് അംഗത്വമുള്ള സംഘടനയുമായാണ് ഉടമ്പടി.
നടന് സുരക്ഷ ഉറപ്പാക്കാന് സംഘടന വേണം. നിര്മ്മാതാക്കള് പറയുന്നതിലും കുറേ കാര്യങ്ങളുണ്ട്, ബാബുരാജ് പറഞ്ഞു. അതേസമയം അമ്മയിലെ അംഗത്വത്തിനായി നേരത്തേ അപേക്ഷ നല്കിയിട്ടുള്ള വേറെയും താരങ്ങളുണ്ട്. ഇവരുടെ അംഗത്വക്കാര്യവും അടുത്ത എക്സിക്യൂട്ടീവ് യോഗത്തില് തീരുമാനിക്കും. അ്ദ്ദേഹം വ്യക്തമാക്കി.