സംഗീത സംവിധായകന് എ.ആര്. റഹ്മാനും ഭാര്യ സൈറാ ബാനുവും വിവാഹമോചിതരാകുന്നുവെന്ന വാര്ത്തയ്ക്ക് പിന്നാലെ, റഹ്മാന്റെ ട്രൂപ്പിലെ അംഗവും പ്രശസ്ത ഗിറ്റാറിസ്റ്റുമായ മോഹിനി ഡേയും വിവാഹമോചിതയായ വിവരം പുറത്തെത്തിയിരുന്നു. ഇതോടെ റഹ്മാന്റെ വിവാഹമോചനത്തിന് ഇതുമായി ബന്ധമുണ്ടെന്ന തരത്തില് അഭ്യൂഹങ്ങളും എത്തി.
അഭ്യൂഹങ്ങളോട് പ്രതികരിച്ച് രംഗത്തെത്തിയിരിക്കുകയാണ് മോഹിനി ഡേ ഇപ്പോള്. തന്റെ സ്വകാര്യതയെ മാനിക്കണമെന്നും അടിസ്ഥാനരഹിതമായ കിംവദന്തികളോട് പ്രതികരിക്കാനില്ലെന്നും മോഹിനി ഡേ വ്യക്തമാക്കി. എരിതീയില് എണ്ണയൊഴിക്കാന് തനിക്ക് തീരെ താല്പര്യമില്ലെന്നും മോഹിനി സോഷ്യല് മീഡിയയില് കുറിച്ചു.
”അഭിമുഖം എടുക്കാനെന്ന് പറഞ്ഞ് വലിയ തോതിലുള്ള അഭ്യര്ത്ഥനകളാണ് എനിക്ക് വന്നു കൊണ്ടിരിക്കുന്നത്. എന്നാല് അതിന്റെ യഥാര്ത്ഥ ഉദ്ദേശം എന്താണെന്ന് എനിക്ക് നന്നായി അറിയാം. അതുകൊണ്ട് അഭിമുഖങ്ങള് തരില്ലെന്ന് എല്ലാവരോടും വളരെ ബഹുമാനപൂര്വം പറഞ്ഞ് ഒഴിഞ്ഞു.”
”ഇത്തരം കിംവദന്തികളുടെ എരിതീയില് എണ്ണയൊഴിക്കാന് എനിക്ക് തീരെ താല്പര്യമില്ല. എന്റെ ഊര്ജം അഭ്യൂഹങ്ങളില് ചിലവിടാനുള്ളതല്ലെന്നാണ് ഞാന് വിശ്വസിക്കുന്നത്. ദയവായി എന്റെ സ്വകാര്യതയെ ബഹുമാനിക്കണം” എന്നാണ് മോഹിനി ഡേ പറയുന്നത്.
അതേസമയം, ഗോസിപ്പുകള്ക്കെതിരെ റഹ്മാന്റെ മക്കളും രംഗത്തെത്തിയിരുന്നു. ഇത്തരം ഗോസിപ്പുകള് യാതൊരു അടിസ്ഥാനമില്ലാത്തവയാണ് എന്നായിരുന്നു റഹ്മാന്റെ മകന് അമീന്റെ പ്രതികരണം. അഭ്യൂഹങ്ങള് സൃഷ്ടിക്കുന്നത് ശത്രുക്കളാണെന്നും വിഡ്ഢികള് അത് പ്രചരിപ്പിക്കുമെന്നും അല്പന്മാര് അത് സ്വീകരിക്കുകയും ചെയ്യും എന്നായിരുന്നു റഹ്മാന്റെ മക്കളായ കദീജയും റഹീമയും ഇന്സ്റ്റഗ്രാം സ്റ്റോറിയില് കുറിച്ചത്.