ഇന്ത്യൻ സിനിമയിൽ ശക്തമായ ഫാൻ ബേസുള്ള സംവിധായകനാണ് അനുരാഗ് കശ്യപ്. നിരവധി പ്രേക്ഷക- നിരൂപ പ്രശംസകൾ നേടിയ ചിത്രങ്ങളാണ് അനുരാഗ കശ്യപ് കരിയറിലുടനീളം സംവിധാനം ചെയ്തിട്ടുള്ളത്. സംവിധായകൻ എന്നതിലുപരി നടനായും നിർമ്മാതാവായും സിനിമയുടെ എല്ലാ മേഖലകളിലും സജീവമാണ് അനുരാഗ് കശ്യപ്.
ഇപ്പോഴിതാ ജിതു മാധവൻ- ഫഹദ് ഫാസിൽ കൂട്ടുകെട്ടിൽ പുറത്തിറങ്ങിയ ആവേശത്തിലെ കാസ്റ്റിംഗിനെ പ്രശംസിച്ച് രംഗത്തെത്തിയിരിക്കുകയാണ് അനുരാഗ് കശ്യപ്. ആവേശത്തിലെ പ്രധാന കഥാപാത്രങ്ങളായ മൂന്ന് പയ്യന്മാരുടെ റോൾ ചെയ്തിരിക്കുന്നത് സോഷ്യൽ മീഡിയ ഇൻഫ്ലുവൻസർമാരാണെന്നും, ബോളിവുഡ് ആയിരുന്നേൽ ഏതെങ്കിലും സ്റ്റാറിനെ അത്തരം റോളുകളിൽ തിരുകികയറ്റുമായിരുന്നുവെന്നും അനുരാഗ് കശ്യപ് പറയുന്നു.
“ഫഹദ് ഫാസിൽ നായകനായെത്തിയ ‘ആവേശം’ എന്ന മലയാള സിനിമയിൽ പ്രധാനപ്പെട്ട മൂന്ന് വേഷങ്ങൾ ചെയ്തത് മൂന്ന് സോഷ്യൽ മീഡിയ ഇൻഫ്ലുവൻസർമാരായ പയ്യന്മാരാണ്. ബോളിവുഡ് ആണെങ്കിൽ aആ റോൾ ഏതെങ്കിലും താരങ്ങളെ കൊണ്ട് കുത്തിനിറയ്ക്കും, ഒരു മികച്ച കഥ പറയുന്നതിനപ്പുറം സ്റ്റാർ പവറിലാണ് ബോളിവുഡ് എപ്പോഴും ശ്രദ്ധകേന്ദ്രീകരിക്കുന്നത്.
മാത്രമല്ല ആവർത്തിച്ചുള്ള ഫോർമുലകളുടെ കെണിയിൽ ബോളിവുഡ് എപ്പോഴും വീഴാറുണ്ട്. എന്നാൽ ചില സമയത്ത് ഔട്ട് ഓഫ് ബോക്സായി ഗംഭീര സിനിമകളും അവർ നിർമ്മിക്കുന്നുണ്ട്. കഴിഞ്ഞ വർഷം പുറത്തിറങ്ങിയ 12th ഫെയിൽ. ഈ വർഷത്തെ ലാപതാ ലേഡീസ്, കിൽ എന്നീ സിനിമകൾ അത്തരത്തിലുള്ളതാണ്. ഒർജിനലായ ആശയങ്ങൾ പുറത്തുവരുമ്പോൾ മാത്രമേ ഇണങ്ങനെ സംഭവിക്കൂ.” എന്നാണ് ദി ഹിന്ദുവിനോട് അനുരാഗ് കശ്യപ് പറഞ്ഞത്.
ബോളിവുഡിലെ മാസ് മസാല സിനിമകളിൽ നിന്നും വ്യത്യസ്തമായി നവീനമായൊരു ആഖ്യാന ശൈലി തന്റെ സിനിമകളിലൂടെ കൊണ്ടുവരാൻ അനുരാഗ് കശ്യപ് എപ്പോഴും ശ്രമിക്കാറുണ്ട്. സണ്ണി ലിയോണിനെ പ്രധാന കഥാപാത്രമായൊരുക്കിയ ‘കെന്നഡി’ എന്ന ചിത്രമാണ് അനുരാഗ് കശ്യപിന്റെ ഒടുവിലായി പുറത്തിറങ്ങിയ ചിത്രം.
ആഷിഖ് അബു സംവിധാനം ചെയ്യുന്ന റൈഫിൾ ക്ലബ്ബ് എന്ന ചിത്രത്തിലൂടെ മലയാളത്തിലും അരങ്ങേറ്റം കുറിക്കാൻ ഒരുങ്ങുകയാണ് അനുരാഗ് കശ്യപ്. നിതിലൻ സാമിനാഥൻ സംവിധാനം ചെയ്യുന്ന വിജയ് സേതുപതി ചിത്രം ‘മഹാരാജ’ എന്ന ചിത്രത്തിലും വില്ലനായാണ് അനുരാഗ് കശ്യപ് എത്തുന്നത്.