തനിക്ക് മികച്ച അഭിനേതാക്കളേക്കാള് ഉപരി മികച്ച വ്യക്തികളെയാണെന്ന് സംവിധായിക അഞ്ജലി മേനോന്. അത്തരം ആളുകള് തന്റെ സിനിമകളിലെ കഥാപാത്രമാകാനാണ് ആഗ്രഹിക്കുന്നതെന്നും അവര് ഒരു മാധ്യമവുമായുള്ള അഭിമുഖത്തില് പറഞ്ഞു.
ക്യാമറയ്ക്ക് മുന്നില് മാത്രമല്ല ക്യാമറയ്ക്ക് പിന്നിലും തന്നെ പ്രചോദിപ്പിക്കുന്നവരാകണം അവര് എന്നും അഞ്ജലി പറഞ്ഞു. സോണി ലിവില് റിലീസിന് ഒരുങ്ങുന്ന ചിത്രം ‘വണ്ടര് വുമണി’ന്റെ പ്രൊമോഷന്റെ ഭാഗമായി സംസാരിക്കവെയാണ് അഞ്ജലി മേനോന് തന്റെ അഭിപ്രായം വ്യക്തമാക്കിയത്.
‘മികച്ച അഭിനേതാക്കളേക്കാള്, മികച്ച വ്യക്തികള് എന്റെ സിനിമകളില് അഭിനയിക്കുന്നതാണ് ഇഷ്ടം. അഭിനേതാക്കളുടെ കഴിവ് വളരെ പ്രധാനമാണ്. പക്ഷെ ക്യാമറയ്ക്ക് പിന്നിലും അവര് എന്നെ കുറച്ചൊന്ന് പ്രചോദിപ്പിക്കണം, അവര് വ്യക്തമാക്കി.
പാര്വതി തിരുവോത്ത്, പദ്മപ്രിയ, നിത്യ മേനോന്, സയനോര ഫിലിപ്പ്, നദിയ മൊയ്തു, അര്ച്ചന പത്മിനി, അമൃത സുഭാഷ് എന്നിവരെ കേന്ദ്ര കഥാപാത്രങ്ങളാക്കി അഞ്ജലി മേനോന് സംവിധാനം ചെയ്യുന്ന വണ്ടര് വുമണ് നവംബര് 18 നാണ് സോണി ലിവില് സ്ട്രീമിംഗ് ആരംഭിക്കുന്നത്.
ആര്എസ്വിപി മൂവീസ്, ഫ്ലൈയിംഗ് യൂണികോണ് എന്റര്ടെയ്ന്മെന്റ് എന്നീ ബാനറുകളിലാണ് നിര്മ്മിച്ചിരിക്കുന്നത്. ആറ് ഗര്ഭിണികള് ഒരു സ്ഥലത്ത് എത്തുന്നതും, അവര്ക്കിടയിലെ സൗഹൃതവും തുടര്ന്നുള്ള സംഭവങ്ങളുമാണ് ചിത്രമെന്നാണ് റിപ്പോര്ട്ട് .