ജീത്തു ജോസഫ്- മോഹൻലാൽ കൂട്ടുക്കെട്ടിൽ പുറത്തിറങ്ങിയ ‘നേര്’ മികച്ച പ്രേക്ഷക പ്രതികരണങ്ങളോടെ മുന്നേറുകയാണ്. ഒരിടവേളയ്ക്ക് ശേഷം മോഹൻലാലിന്റെ ഏറ്റവും മികച്ച പ്രകടനമാണ് നേരിലൂടെ കണ്ടെതെന്നാണ് ആരാധകർ പറയുന്നത്. മോഹൻലാലിന്റെ പ്രകടനത്തോടൊപ്പം പ്രേക്ഷകർ ഏറ്റവും കൂടുതൽ ചർച്ച ചെയ്യുന്നത് അനശ്വര രാജൻ അവതരിപ്പിച്ച സാറ എന്ന കഥാപാത്രമാണ്. അനശ്വര രാജന്റെ കരിയറിയിലെ തന്നെ ഏറ്റവും മികച്ച പ്രകടനമാണ് നേരിലെ സാറ എന്നാണ് പ്രേക്ഷകർ ഒന്നടങ്കം പറയുന്നത്.
ഇപ്പോഴിതാ അനശ്വര അഭിനയിച്ച ഒരു സിനിമയിലെ പ്രകടനത്തെ പ്രശംസിക്കാൻ അന്ധനായ ഒരാൾ തന്നെ തേടി വന്ന അനുഭവം പങ്കുവെക്കുകയാണ് അനശ്വര രാജൻ. ഉദാഹരണം സുജാത എന്ന സിനിമയിലെ അനശ്വരയുടെ പ്രകടനം കണ്ടാണ് ആരാധകൻ അനശ്വരയെ പ്രശംസിക്കാൻ വീട്ടിലെത്തിയത്.
“ഞങ്ങള്‍ നാട്ടിലായിരുന്ന സമയത്ത്. സുജാത കണ്ടിട്ട് അന്ധനായ ഒരാള്‍ അന്വേഷിച്ചു വന്നിരുന്നു. ദൂരെ എവിടെയോ നിന്നാണ് വരുന്നത്. ബസിനാണ് വന്നതും. വഴിയുമറിയില്ല. അടുത്തുള്ള ആള്‍ക്കാരോട് ചോദിച്ച് ചോദിച്ചാണ് വന്നത്. വീട്ടിലേക്കല്ല വേറൊരു വീട്ടിലേക്കാണ് വന്നത്. ഞങ്ങളുടെ വീട്ടിലേക്കുള്ള വഴി അറിയാത്തതിനാല്‍. മഞ്ജു ചേച്ചിയുടെ മകളായി അഭിനയിച്ച സിനിമ കണ്ട് ഇഷ്ടപ്പെട്ടാണ് വരുന്നത് എന്ന് പറഞ്ഞു.
ഞങ്ങള്‍ എവിടെയോ പോകാന്‍ വേണ്ടി ഇറങ്ങുകയായിരുന്നു. അപ്പോഴാണ് അച്ഛനെ വിളിക്കുന്നത്, ഇവിടെ ഒരാള്‍ വന്നിട്ടുണ്ട് ഒന്ന് വരുമോ എന്ന് ചോദിച്ച്. എന്താണെന്ന് അറിയാനായി ഞങ്ങള്‍ അങ്ങോട്ട് ചെല്ലുകയായിരുന്നു. സിനിമ കണ്ടു, ഭയങ്കര ഇഷ്ടമാണെന്നൊക്കെ പറഞ്ഞ് ഓരുപാട് സംസാരിച്ചു. എനിക്ക് അത്ഭുതമായിരുന്നു. അങ്ങനെയുള്ളൊരാള്‍, അവര്‍ക്ക് സിനിമ ഇഷ്ടപ്പെട്ടുവെന്ന് പറയുമ്പോള്‍ അവര്‍ സിനിമ കാണാന്‍ വേണ്ടി എടുത്ത എഫേര്‍ട്ടൊക്കെ ഓര്‍മ്മ വരും.
നമ്മള്‍ എത്ര അവഗണിക്കാന്‍ നോക്കിയാലും ഒരു ഘട്ടത്തില്‍ അത് ബാധിക്കും. വ്യക്തിപരമായി പറയുന്നതിനേക്കാള്‍ എന്റെ അഭിനയത്തെ കുറിച്ച് മോശം കമന്റുകള്‍ പറയുമ്പോഴാണ് കൂടുതൽ വേദനിക്കുന്നത്. പേഴ്‌സണലായി വരുന്ന കമന്റുകള്‍, അത് ആറ്റിട്യൂഡിനെ കുറിച്ചായാലും ഡ്രസിങ്ങിനെ കുറിച്ചായാലും അതിനേക്കാള്‍ അഭിനയം ശരിയല്ലെന്ന് പറയുമ്പോഴാണ് കൂടുതൽ സങ്കടം തോന്നാറ്. ” എന്നാണ് ജിഞ്ചർ മീഡിയയ്ക്ക് നല്കിയ അഭിമുഖത്തിൽ അനശ്വര പറഞ്ഞത്.