മമ്മൂട്ടിയുടെയും അഖില് അക്കിനേനിയുടെയും കരിയറിലെ ഏറ്റവും വലിയ പരാജയങ്ങളില് ഒന്നായി മാറിയിരുന്നു ‘ഏജന്റ്’ എന്ന സിനിമ. ബിഗ് ബജറ്റില് മാസ് ആക്ഷന് സീനുകളുമായി എത്തിയ ചിത്രം ബോക്സോഫീസില് ഫ്ളോപ്പ് ആവുകയായിരുന്നു. ഏജന്റിന്റെ പരാജയത്തെ കുറിച്ച് സംസാരിച്ചിരിക്കുകയാണ് അഖില് ഇപ്പോള്.
താന് പരമാവധി ശ്രമിച്ചിട്ടും സിനിമയ്ക്ക് പ്രതീക്ഷിച്ചത് പോലെ പ്രേക്ഷകരോട് സംവദിക്കാനായില്ല, ഇനി ശക്തമായി തിരിച്ചു വരും എന്നാണ് അഖില് പറയുന്നത്. ”നമ്മുടെ സിനിമയ്ക്ക് ജീവന് നല്കാനായി ആത്മാര്ത്ഥതയോടെ പ്രവര്ത്തിച്ച ഏജന്റിന്റെ കാസ്റ്റ് ആന്ഡ് ക്രൂവിനോട് നന്ദി പറയുന്നു.”
”ഞങ്ങള് കഴിവിന്റെ പരമാവധി പരിശ്രമിച്ചിട്ടും സ്ക്രീനില് സിനിമക്ക് പ്രതീക്ഷിച്ചത് പോലെ പ്രേക്ഷകരോട് സംവദിക്കാനായില്ല. ഞങ്ങള്ക്ക് ഒരു നല്ല സിനിമ നല്കാനായില്ല. എനിക്ക് ഏറ്റവും വലിയ പിന്തുണ നല്കിയ നിര്മാതാവ് അനിലിന് നന്ദി. ഞങ്ങളുടെ സിനിമയില് വിശ്വാസമര്പ്പിച്ച ഡിസ്ട്രിബ്യൂട്ടേഴ്സിന് നന്ദി.”
”വലിയ പിന്തുണ നല്കിയ മാധ്യമങ്ങള്ക്ക് നന്ദി. നിങ്ങള് നല്കിയ സ്നേഹവും എനര്ജിയും കാരണമാണ് ഞാന് വര്ക്ക് ചെയ്തത്. അതിന് എന്റെ ഹൃദയത്തില് നിന്നുമുള്ള നന്ദി. എന്നില് വിശ്വാസമര്പ്പിച്ച എല്ലാവര്ക്കും വേണ്ടി ഞാന് ശക്തമായി തിരിച്ചുവരും” എന്നാണ് അഖില് സോഷ്യല് മീഡിയയില് കുറിച്ചിരിക്കുന്നത്.
ഏപ്രില് 28ന് ആയിരുന്നു ഏജന്റ് തിയേറ്ററുകളില് എത്തിയത്. 65 കോടി ബജറ്റില് ഒരുക്കിയ ചിത്രത്തിന് ആകെ നേടാനായത് 13 കോടി കളക്ഷന് മാത്രമാണ്. സുരേന്ദര് റെഡ്ഡിയാണ് ചിത്രം തിരക്കഥ എഴുതി സംവിധാനം ചെയ്തത്. റോ ചീഫ് കേണല് മഹാദേവനായാണ് ചിത്രത്തില് മമ്മൂട്ടി വേഷമിട്ടത്.