ജയസൂര്യ നായകനായി എത്തിയ ‘വെള്ളം’ എന്ന സിനിമ കണ്ടതിന് ശേഷമാണ് താൻ മദ്യപാനം നിർത്തിയതെന്ന് തുറന്നുപറഞ്ഞ് അജു വർഗീസ്. കുഞ്ഞിരാമയണം സിനിമയുടെ ചിത്രീകരണ സമയത്ത് എല്ലാവരും കൂടിയിരുന്ന് വെള്ളമടിക്കുമായിരുന്നുവെന്നും, മദ്യപിച്ച് കഴിഞ്ഞാൽ താൻ ബാഹുബലിയാണെന്ന് തനിക്ക് തോന്നുമായിരുന്നുവെന്നും അജു വർഗീസ് പറയുന്നു.
“കുഞ്ഞിരാമായാണം സിനിമയുടെ സമയത്ത് ഷൂട്ടിങ്ങ് കഴിഞ്ഞാൽ പിന്നെ എല്ലാവരും സന്തോഷത്തോടെയാണ് ഇരിക്കുക. കാരണം വളരെ നല്ല സിനിമയാണ് അത്. നല്ല സിനിമയാണ് സംഭവിച്ചു കൊണ്ടിരിക്കുന്നതെന്ന് നമ്മുക്ക് അറിയുന്ന കാര്യമാണ്. പിന്നെ അതിൽ എല്ലാവരും സുഹൃത്തുക്കളാണ്. കൂടെ വിനീതുമുണ്ട്. പക്ഷെ വിനീത് വെള്ളമടിക്കാനൊന്നും നിൽക്കില്ല. അവൻ ഉറക്കം വരുന്നുവെന്ന് പറഞ്ഞൊക്കെ മാറി നിൽക്കും. ഹരീഷേട്ടനും ബിജുക്കുട്ടൻ ചേട്ടനും ഉൾപ്പെടെയുള്ള ബാക്കി എല്ലാവരും അവിടെ ഉണ്ടാകും.
ആ അവസരത്തിലാകാം ഞാൻ വെള്ളമടിക്കുന്നത് ധ്യാൻ കാണുന്നത്. ഉള്ളിൽ രണ്ടെണ്ണം ചെന്നാൽ എനിക്ക് ഞാൻ പ്രഭാസാണെന്ന് തോന്നും. എനിക്ക് നല്ല ശക്തിയുണ്ടെന്നും തോന്നും. ബാഹുബലി കണ്ടതിന് ശേഷമാണ് എനിക്ക് ബാഹുബലിയുടെ ശക്തിയാണെന്ന് തോന്നി തുടങ്ങിയത്. അങ്ങനെയുള്ള തോന്നല് മാത്രമാണ് ഉള്ളത്.
വെള്ളം എന്ന സിനിമ കാണുന്നത് വരെയായിരുന്നു ഇത്. ആ സിനിമ കണ്ടതോടെ വലിയ ഒരു തിരിച്ചറിവ് ഉണ്ടായി. കൊവിഡിന്റെ സമയത്താണ് ആ സിനിമ പുറത്തിറങ്ങിയത്. അത് തന്നെയായിരുന്നു ഞാൻ വെള്ളമടി കട്ട് ഓഫ് ചെയ്യാൻ കാരണമായത്.
ഇപ്പോൾ കള്ളുകുടിയില്ല. രണ്ട് വർഷത്തിന് മുകളിലായി വെള്ളമടി നിർത്തി. ആർക്കും വാക്ക് കൊടുത്തതിന്റെ പേരിലായിരുന്നില്ല, ആ സിനിമയുടെ ഇമ്പാക്റ്റിലായിരുന്നു നിർത്തിയത്.” എന്നാണ് ഫ്ലവേഴ്സ് കോമഡി ഷോയിൽ അജു വർഗീസ് പറഞ്ഞത്.
അതേസമയം മുരളി കുന്നുംപുറത്ത് എന്ന വ്യക്തിയുടെ ജീവിതത്തെ ആസ്പദമാക്കിയാണ് പ്രജേഷ് സെൻ വെള്ളം എന്ന ചിത്രമൊരുക്കിയത്. ജയസൂര്യയ്ക്ക് മികച്ച നടനുള്ള കേരള സംസ്ഥാന ചലച്ചിത്രം പുരസ്കാരം നേടികൊടുത്ത ചിത്രം കൂടിയാണ് വെള്ളം.