മലയാളത്തിന്റെ പ്രിയസംവിധായകനാണ് സത്യന്‍ അന്തിക്കാട്. ‘കുറുക്കന്റെ കല്യാണം’ മുതല്‍ ‘മകള്‍’ വരെ കഴിഞ്ഞ നാല്‍പ്പത് വര്‍ഷങ്ങളായി സത്യന്‍ മലയാളി കുടുംബങ്ങളുടെ ഇഷ്ടസംവിധായകനാണ്. അദ്ദേഹത്തിന്റെ ചിത്രങ്ങളില്‍ ഏറെ പ്രേക്ഷക ശ്രദ്ധ നേടിയ ചിത്രങ്ങളിലൊന്നാണ് അച്ചുവിന്റെ അമ്മ. ഇതിലേക്ക് മീര ശാസ്മിന്റെ അമ്മയായി അഭിനയിക്കാന്‍ ഉര്‍വ്വശിയെ സമീപിച്ചതിനെ കുറിച്ച് പറഞ്ഞിരിക്കുകയാണ് സത്യന്‍ അന്തിക്കാട്.
‘അന്ന് ഉര്‍വശി സിനിമയില്‍ നിന്ന് പോയിട്ട് എട്ടു വര്‍ഷം കഴിഞ്ഞിരുന്നു. ഇടയ്ക്ക് അന്വേഷിച്ചപ്പോള്‍ അഭിനയിക്കുന്നില്ലെന്നായിരുന്ന മറുപടി. ‘അച്ചുവിന്റെ അമ്മ’ മനസ്സിലേക്കു വന്നപ്പോള്‍ ഉര്‍വശിയെ വിളിച്ച് ‘ഞാനൊന്നു കാണാന്‍ വരട്ടെ’ എന്നു ചോദിച്ചു. ചെന്നൈയിലെ ഫ്‌ലാറ്റിലെത്തി. വീണ്ടു അഭിനയിക്കുമോ എന്നു ചോദിച്ചു, ‘സത്യേട്ടന്‍ പറയുകയാണെങ്കില്‍ ഞാന്‍ വരാമെന്നായിരുന്നു’ മറുപടി.’
‘കഥ പറയും മുന്നേ ഞാന്‍ ചോദിച്ചു, ‘പക്ഷേ, മീരാ ജാസ്മിന്റെ അമ്മയായിട്ട് അഭിനയിക്കണം. പറ്റുമോ’ നായികയായിട്ട് അഭിനയിച്ചിരുന്ന നടികള്‍ പെട്ടെന്നിത് കേള്‍ക്കുമ്പോള്‍ മനസ്സു മാറും. ഉര്‍വശിയുടെ ആദ്യ ഡയലോഗ് ഇങ്ങനെയായിരുന്നു, ‘സത്യേട്ടന്റെ സിനിമയാണെങ്കില്‍ സുകുമാരി ചേച്ചി യുടെ അമ്മയായിട്ട് ആണെങ്കിലും അഭിനയിക്കും.’
‘അന്ന് ഉര്‍വശിയോടു ചോദിച്ച അതേ ചോദ്യമാണ് ‘മകള്‍’ എന്ന പുതിയ സിനിമയിലേക്ക് വിളിച്ചപ്പോള്‍ മീരാ ജാസ്മിനോടും ചോദിച്ചത്. ‘പ്ലസ് ടു കുട്ടിയുടെ അമ്മയായി അഭിനയിക്കണം പറ്റുമോ?’ ‘എനിക്ക് അ തിനുള്ള മെച്യൂരിറ്റി ആയി സത്യന്‍ അങ്കിള്‍’ എന്നായിരുന്നു മീരയുടെ ഉത്തരം’ വനിതയ്ക്ക് ന്ല്‍കിയ അഭിമുഖത്തില്‍ സത്യന്‍ അന്തിക്കാട് പറഞ്ഞു.