സ്ത്രീധനത്തിന് എതിരെ പങ്കുവെച്ച കുറിപ്പ് പിന്‍വലിച്ചത് ആരെയും പേടിച്ചിട്ടല്ലെന്ന് നടി വീണ നായര്‍. മറ്റ് വിഷയങ്ങളില്‍ പ്രതികരിച്ചപ്പോള്‍ ഇതിലും വലിയ ഭീഷണി ഉണ്ടായിട്ടും പോസ്റ്റുകള്‍ പിന്‍വലിച്ചിട്ടില്ല. എന്നാല്‍ തന്റെ മകനെ കുറിച്ച് കമന്റുകള്‍ വന്നതോടെയാണ് പോസ്റ്റ് ഡിലീറ്റ് ചെയ്തതെന്ന് വീണ ഫെയ്‌സ്ബുക്ക് ലൈവിലൂടെ വ്യക്തമാക്കി.
ഗാര്‍ഹിക പീഡനത്തെ തുടര്‍ന്ന് വിസ്മയ എന്ന പെണ്‍കുട്ടി ആത്മഹത്യ ചെയ്ത സംഭവത്തെ അപലപിച്ച് സ്ത്രീധനത്തിന് എതിരെയുള്ള കുറിപ്പ് ആയിരുന്നു വീണ പങ്കുവെച്ചത്. വിവാഹത്തിന് സ്വര്‍ണം വാങ്ങരുതെന്നും പെണ്‍കുട്ടികളുടെ ഉന്നമനം ഉറപ്പാക്കണമെന്നും കുറിപ്പിലൂടെ ആവശ്യപ്പെട്ടിരുന്നു.
വീണയുടെ പോസ്റ്റിന് താഴെ ധാരാളം ആഭരണം അണിഞ്ഞ് നില്‍ക്കുന്ന വീണയുടെ ചിത്രം പങ്കുവെച്ച് അവഹേളിക്കുന്ന കമന്റുകള്‍ എത്തി. തുടര്‍ന്ന് താരം പോസ്റ്റ് ഡിലീറ്റ് ചെയ്യുകയായിരുന്നു. വിവാഹത്തിന് 44 ദിവസം മുമ്പ് അച്ഛനും ആറു മാസം മുമ്പ് അമ്മയും മരിച്ചു. സ്വന്തമായി അദ്ധ്വാനിച്ച് ഉണ്ടാക്കിയ കുറച്ച് സ്വര്‍ണമാണ് തനിക്ക് ഉണ്ടായിരുന്നത് എന്ന് വീണ ഫെയ്‌സ്ബുക്ക് ലൈവില്‍ പറഞ്ഞു.
അച്ഛന്റെയും അമ്മയുടെയും ആഗ്രഹവും അന്നത്തെ നാട്ടുനടപ്പും കാരണം ഒരുപാട് സ്വര്‍ണം ധരിക്കണമെന്ന് തനിക്ക് ഉണ്ടായിരുന്നു. അതിനായി സുഹൃത്തിന്റെ ജ്വല്ലറിയില്‍ നിന്നും ഒരു ദിവസത്തേയ്ക്കായി സ്വര്‍ണം എടുക്കുകയായിരുന്നു. ഇക്കാര്യം ഭര്‍ത്താവിന്റെ വീട്ടുകാര്‍ക്കും അറിയാം.
അന്നത്തെ തന്റെ ഭ്രമം കൊണ്ടാണ് അങ്ങനെ ചെയ്തത്. അതിലിപ്പോള്‍ പശ്ചാത്താപമുണ്ട്. 7 വര്‍ഷം കൊണ്ട് തനിക്കു മാറ്റം വന്നിട്ടുണ്ട്. സ്വര്‍ണം ചോദിച്ച് വരുന്ന പുരുഷന്‍മാരെ പെണ്‍കുട്ടികള്‍ വേണ്ടെന്നു തന്നെ പറയണമെന്നാണു തന്റെ നിലപാടെന്നും വീണ വ്യക്തമാക്കി.