മുൻപൊരിക്കൽ ഡൽഹിയിൽ വെച്ച് തനിക്ക് നേരെയുണ്ടായ ലൈംഗികാതിക്രമം വെളിപ്പെടുത്തി ബോളിവുഡ് താരം തിലോത്തമ ഷോമെ. ഡൽഹിയിൽ ബസ് കാത്ത് നിൽക്കുമ്പോൾ ഒരു കൂട്ടം ആളുകൾ വന്ന് തന്നെ ശല്യപ്പെടുത്താൻ വന്നുവെന്നും, അവരിൽ നിന്നും രക്ഷനേടാനായി, ഒരു ഡോക്ടറുടെ കാറിന് ലിഫ്റ്റ് ചോദിച്ചുവെന്നും എന്നാൽ അയാളിൽ നിന്നും തനിക്ക് മോശം അനുഭവമാണ് നേരിട്ടെതെന്നും തിലോത്തമ ഷോമെ വെളിപ്പെടുത്തി.
(trigger warning- sexual assault)
“ഡൽഹിയിൽ ബസ് കാത്തുനിൽക്കുമ്പോഴാണ് എല്ലാത്തിന്റെയും തുടക്കം. ബസ് സ്റ്റോപ്പിൽ നിൽക്കുമ്പോൾ പൊടുന്നനെയാണ് ഒരു കാർ അടുത്തുവന്നു നിന്നത്. വാഹനത്തിൽനിന്നിറങ്ങിയ ഒരുസംഘമാളുകൾ ചുറ്റുംകൂടിനിന്ന് എന്നെ ശല്യപ്പെടുത്താൻതുടങ്ങി. എങ്ങനെയെങ്കിലും അവിടെനിന്ന് രക്ഷപ്പെട്ടാൽ മതിയെന്ന ചിന്തയിൽ അല്പംകൂടി മുന്നോട്ടേക്ക് മാറിനിന്നു. കാരണം ഓടിയാൽ അവർ പിന്നാലെ വരുമെന്ന് എനിക്ക് ഉറപ്പായിരുന്നു. അതുകൊണ്ട് ഏതെങ്കിലും വാഹനത്തിന് കൈകാട്ടാമെന്ന ധാരണയിൽ ആ റോഡിൽ തന്നെ നിന്നു.
ഒരുപാട് കാറുകളും വാഹനങ്ങളും അതുവഴി പോയെങ്കിലും ഒന്നും നിർത്തിയില്ല. അപ്പോഴാണ് മെഡിക്കൽ ചിഹ്നം പതിച്ച ഒരു കാർ വരുന്നതും അരികിൽ നിർത്തുന്നതും. പ്രാണരക്ഷാർത്ഥം അതിന്റെ മുൻസീറ്റിലാണ് ഒരു അപരിചിതനൊപ്പം കയറിയിരുന്നത്. കുറച്ചുദൂരമേ മുന്നോട്ടുപോയുള്ളൂ. അയാൾ എന്റെ കൈ പിടിക്കുകയും അയാളുടെ പാന്റ്സിന്റെ സിബ്ബ് അഴിക്കുകയും ചെയ്തു. അയാളെന്താണ് ഉദ്ദേശിക്കുന്നതെന്ന് എനിക്ക് ഊഹിക്കാൻ കഴിഞ്ഞു. ആ സമയത്ത് ഞാനെന്താണ് ചെയ്തതെന്ന് എനിക്കറിയില്ല. എന്തോ ഒന്ന് സംഭവിച്ചതുകൊണ്ട് അയാൾക്ക് കാർ നിർത്തേണ്ടിവന്നു. എന്നോട് പുറത്തിറങ്ങാൻ അയാൾ പറഞ്ഞു.
അയാളൊരു ഡോക്ടറായതുകൊണ്ട് സുരക്ഷിതത്വമുണ്ടാവുമെന്ന് ഞാൻ വിചാരിച്ചു. പക്ഷേ അയാൾ മോശമായി പെരുമാറാൻ തുടങ്ങിയ ആ നിമിഷം ഞാനയാളെ അടിച്ചു. അതൊരു ഭീകരമായ അനുഭവമായിരുന്നു. ഞാൻ ശരിക്കും വിറച്ചുപോയി. എന്നാൽ തിരിച്ചടിക്കാനുള്ള എൻ്റെ അവബോധം അപകടകരമായ അവസ്ഥയിൽ നിന്ന് കരകയറാൻ ഒരുപാട് സഹായിച്ചു.” എന്നാണ് തിലോത്തമ ഷോമെ പറഞ്ഞത്.
മൺസൂൺ വെഡ്ഡിംഗ്, എ ഡെത്ത് ഇൻ ദി ഖുഞ്ച്, അൻഗ്രേസി മീഡിയം, ഈസ് ലവ് ഇനഫ് സർ തുടങ്ങീ മികച്ച സിനിമകളിലൂടെയും നിരവധി വെബ് സീരീസുകളിലൂടെയും ശ്രദ്ധേയമായ പ്രകടനം കാഴ്ചവെച്ച്, ചുരുങ്ങിയ കാലം കൊണ്ട് ഇന്ത്യൻ സിനിമയിലെ തന്നെ മികച്ച നടിമാരുടെ പട്ടികയിൽ ഇടം പിടിച്ച താരമാണ് തിലോത്തമ ഷോമെ. ഈ വെളിപ്പെടുത്തലിന് ശേഷം നിരവധി ആളുകളാണ് താരത്തിന് പിന്തുണയുമായി എത്തിയിരിക്കുന്നത്.