കങ്കണ റണാവത്ത് നായികയായെത്തുന്ന ഏറ്റവും പുതിയ ചിത്രം ‘എമർജൻസി’യിൽ വേഷമിട്ടതുകൊണ്ട് തനിക്ക് വധഭീഷണികൾ വരുന്നുണ്ടെന്ന് വെളിപ്പെടുത്തി മലയാളി താരം വിശാഖ് നായർ. ഇന്ദിരഗാന്ധിയുടെ ജീവിതത്തെ ആസ്പദമാക്കി കങ്കണ റണാവത്ത് തന്നെയാണ് ചിത്രം സംവിധാനം ചെയ്യുന്നത്.
ചിത്രത്തിൽ ജർനയ്ൽ സിങ് ഭിന്ദ്രാൻവാലെയുടെ കഥാപാത്രമാണ് താൻ അവതരിപ്പിക്കുന്നത് എന്ന് തെറ്റിദ്ധരിച്ചാണ് ആളുകൾ വധഭീഷണി മുഴക്കുന്നത് എന്നാണ് വിശാഖ് നായർ പറയുന്നത്. താൻ അവതരിപ്പിക്കുന്നത് സഞ്ജയ് ഗാന്ധിയുടെ വേഷമാണെന്നും വിശാഖ് നായർ വ്യക്തമാക്കി.
“കഴിഞ്ഞ കുറച്ച് ദിവസങ്ങളായി എനിക്ക് വധ ഭീഷണി നേരിടുകയാണ്. ‘എമര്ജൻസി’ സിനിമയിൽ ഞാൻ അവതരിപ്പിക്കുന്ന കഥാപാത്രം ജർനയ്ൽ സിങ് ഭിന്ദ്രാൻവാലെയുടേതാണെന്നു തെറ്റായി വിശ്വസിച്ചുകൊണ്ടാണ് ഒരുകൂട്ടം ആളുകൾ ഭീഷണി സന്ദേശം അയയ്ക്കുന്നത്.
സഞ്ജയ് ഗാന്ധിയുടെ േവഷമാണ് ഞാൻ അവതരിപ്പിക്കുന്നതെന്ന് ആവര്ത്തിച്ചു പറയുന്നു. വെറുപ്പും വിദ്വേഷവും പടർത്തുന്നതിനു മുമ്പ് കാര്യങ്ങളുടെ സത്യാവസ്ഥ കൂടി എല്ലാവരും മനസ്സിലാക്കണമെന്ന് വിനീതമായി അഭ്യർഥിക്കുന്നു.” എന്നാണ് വിശാഖ് നായർ കുറിച്ചത്.