തുടരെ തുടരെയുള്ള പരാജയങ്ങളില് നിന്നുള്ള മുക്തി എന്നോണം ബോളിവുഡ് പ്രതീക്ഷ അര്പ്പിക്കുന്ന സിനിമയാണ് ബ്രഹ്മാസ്ത്ര. ഇന്ത്യന് പുരാണങ്ങളിലെ ആഴത്തില് വേരൂന്നിയ സങ്കല്പ്പങ്ങളും കഥകളും പ്രചോദനം ഉള്ക്കൊണ്ട് ആധുനിക ലോകത്തില് സജ്ജീകരിച്ചിരിക്കുന്ന പുതിയ സിനിമാറ്റിക് പ്രപഞ്ചമാണ് ‘ബ്രഹ്മാസ്ത്ര. ഫാന്റസി, സാഹസികത, നന്മ, തിന്മ, സ്നേഹം, പ്രതീക്ഷ എന്നിവ ഒത്തുചേരുന്ന ഒരു സിനിമ.
രണ്ബീര് കപൂറും ആലിയ ഭട്ടും മുഖ്യ വേഷങ്ങളില് എത്തുന്ന ചിത്രം സെപ്റ്റംബര് 9ന് ആണ് തിയേറ്ററുകളില് എത്തുന്നത്. അയാന് മുഖര്ജി സംവിധാനം ചെയ്ത സിനിമയുടെ ബജറ്റിനെ കുറിച്ചുള്ള വിവരങ്ങളാണ് ഇപ്പോള് പുറത്തു വരുന്നത്. 410 കോടിയാണ് ‘ബ്രഹ്മാസ്ത്ര’യുടെ നിര്മ്മാണ ചിലവ്. പബ്ലിസിറ്റിയും പ്രിന്ഡിങ്ങും ഒഴികെയുള്ള തുകയാണിത്. റിപ്പോര്ട്ടുകള് അനുസരിച്ച് ബോളിവുഡിലെ ഏറ്റവും ചെലവേറിയ സിനിമയാണ് ഇത് എന്നാണ് വിവരം.
സിനിമയുടെ ഓരോ ഫ്രെയിമിലും ഈ ചെലവ് കാണാനാകും. അയാനും സംഘത്തിനും മികച്ച വിഷ്വലുകള് കൊണ്ടുവരാന് കഴിഞ്ഞു. ജൂണ് 15ന് റിലീസ് ചെയ്ത ട്രെയ്ലര് ഒരു സാമ്പിള് മാത്രമാണ് എന്നാണ് സിനിമയുമായി ബന്ധപ്പെട്ട അടുത്ത വൃത്തങ്ങള് പറയുന്നത്. ഇത് ഇന്ത്യന് മാര്വല് ആണോ എന്ന് തോന്നിപ്പിക്കുന്ന രീതിയിലായിരുന്നു സിനിമയുടെ ട്രെയ്ലര് എത്തിയിരുന്നത്.
അതേസമയം, ‘ബ്രഹ്മാസ്ത്ര’യ്ക്ക് എതിരെ ബോയ്കോട്ട് ആഹ്വാനങ്ങള് ഉയരുന്നുണ്ട്. തന്റെ ഇഷ്ട ഭക്ഷണത്തെ കുറിച്ച് രണ്ബീര് കപൂര് പറയുന്നൊരു വീഡിയോ പ്രചരിപ്പിച്ച് കൊണ്ടാണ് ബ്രഹ്മാസ്ത്രയ്ക്ക് എതിരെ ക്യാംപെയ്ന് നടക്കുന്നത്. പഴയൊരു അഭിമുഖത്തിന്റെ വീഡിയോ കട്ടിങ്ങാണ് സോഷ്യല് മീഡിയയില് പ്രചരിക്കുന്നത്. ഇതില് ഇഷ്ട ഭക്ഷണങ്ങള് ഏതൊക്കെയാണെന്ന് അവതാരകന് ചോദിക്കുന്നുണ്ട്. റെഡ് മീറ്റ് ഭക്ഷണങ്ങള് ഇഷ്ടമാണെന്നും ബീഫിന്റെ ആരാധകനാണ് താനെന്നും ആയിരുന്നു രണ്ബീറിന്റെ മറുപടി. ഈ ഭാഗം മാത്രം കട്ട് ചെയ്ത് ട്വിറ്ററിലിട്ടാണ് ചിത്രത്തിനെതിരെ ബോയ്കോട്ട് ക്യാംപെയ്ന് നടക്കുന്നത്.
കരണ് ജോഹറിന്റെ ധര്മ്മ പ്രൊഡക്ഷന്സ്, ഫോക്സ് സ്റ്റാര് സ്റ്റുഡിയോസ്, നമിത് മല്ഹോത്ര എന്നിവര് ചേര്ന്നാണ് ബ്രഹ്മാസ്ത്ര നിര്മിക്കുന്നത്. സിനിമയ്ക്ക് മൂന്നുഭാഗങ്ങള് ഉണ്ടാകുമെന്ന് നേരത്തെ റിപ്പോര്ട്ടുകള് വന്നിരുന്നു. ബ്രഹ്മാസ്ത്ര ഒന്നാം ഭാഗം: ശിവ ആണ് ഇപ്പോള് റിലീസിന് ഒരുങ്ങുന്നത്. സിനിമയുടെ ടൈറ്റില് പ്രയാഗിലെ കുംഭമേളയില് മഹാശിവരാത്രി നാളിലായിരുന്നു റിലീസ് ചെയ്തത്. ഹിന്ദി, തമിഴ്, തെലുങ്ക്, മലയാളം, കന്നഡ ഭാഷകളിലാണ് സിനിമ റിലീസ് ചെയ്യുന്നത്. സിനിമയുടെ ദക്ഷിണേന്ത്യന് വിതരണാവകാശം സംവിധായകന് എസ്.എസ്. രാജമൗലിയാണ്. തമിഴ്, തെലുങ്ക്, കന്നഡ, മലയാളം എന്നീ ഭാഷകളില് രാജമൗലിയാണ് ചിത്രം തിയേറ്ററുകളിലെത്തിക്കുന്നത്.
2017ല് ട്വിറ്ററിലൂടെയാണ് കരണ് ജോഹര് ‘ബ്രഹ്മാസ്ത്ര’ പ്രഖ്യാപിച്ചത്. റണ്ബീറിന്റെ ‘യേ ജവാനി ഹേ ദീവാനി’ എന്ന ചിത്രത്തിന്റെ ഷൂട്ടിംഗിനിടയിലാണ് താന് ഈ സിനിമയുടെ ആശയം മുന്നോട്ട് വെച്ചതെന്ന് സംവിധായകന് അയാന് നേരത്തെ പറഞ്ഞിരുന്നു. ഏകദേശം അഞ്ച് വര്ഷം മുമ്പാണ് സിനിമയുടെ ഷൂട്ടിംഗ് ആരംഭിച്ചത്. അമിതാഭ് ബച്ചന്, നാഗാര്ജുന അക്കിനേനി, മൗനി റോയി, എന്നിവരാണ് പ്രധാന വേഷങ്ങള് കൈകാര്യം ചെയ്യുന്നത്. രണ്ബീര് ശിവ എന്ന കഥാപാത്രത്തെയും ആലിയ ഇഷ എന്ന കഥാപാത്രത്തെയുമാണ് അവതരിപ്പിക്കുന്നത്. സെപ്റ്റംബര് 9ന് തിയറ്ററിലെത്തുന്ന സിനിമ ബോളിവുഡിനെ കൈപിടിച്ച് ഉയര്ത്തുമെന്ന പ്രതീക്ഷയിലാണ് ഏവരും.