പ്രഭാസ് ആരാധകര് തന്നെ അസഭ്യം പറയുകയും പരിഹസിക്കുകയും ചെയ്തുവെന്ന് സംവിധായകന് വിവേക് അഗ്നിഹോത്രി. ‘ദ വാക്സിന് വാര്’ എന്ന ചിത്രത്തിന്റെ പ്രമോഷനുമായി ബന്ധപ്പെട്ട അഭിമുഖത്തിലാണ് സംവിധായകന് ഇക്കാര്യം വെളിപ്പെടുത്തിയിരിക്കുന്നത്.
സെപ്റ്റംബര് 28ന്, ഇന്ന് വാക്സിന് വാര് ചിത്രം തിയേറ്ററുകളിലേക്ക് എത്തിയിരിക്കുകയാണ്. പ്രഭാസ് ചിത്രം ‘സലാര്’ നേരത്തെ സെപ്റ്റംബര് 28ന് ആയിരുന്നു റിലീസ് പ്രഖ്യാപിച്ചിരുന്നത്. ഈ പശ്ചാത്തലത്തിലാണ് താന് ആക്രമിക്കപ്പെട്ടത് എന്നാണ് സംവിധായകന് പറയുന്നത്.
”ദ വാകിസിന് വാറിനൊപ്പം റിലീസ് ചെയ്യേണ്ട ചിത്രമായിരുന്നു സലാര്. പ്രഭാസ് ആരാധകര് അസഭ്യം പറയുകയും പരിഹസിക്കുകയും ചെയ്യുന്നു. ദ വാക്സിന് വാര് ഒരു ചെറിയ സിനിമയാണ്. വലിയ താരങ്ങളൊന്നുമില്ല. 12.5 കോടിയാണ് ആകെ ചിലവായത്. സലാര് 300 കോടിയുടെ ചിത്രമാണ്” എന്നാണ് വിവേക് അഗ്നിഹോത്രി പറയുന്നത്.
‘ജവാന്’ സിനിമയുടെ വിജയത്തിന് പിന്നാലെ ഷാരൂഖ് ഖാന്റെ ആരാധകരും തന്നെ അസഭ്യം പറഞ്ഞുവെന്ന് വിവേക് അഗ്നിഹോത്രി ആരോപിക്കുന്നുണ്ട്. വലിയ ബോളിവുഡ് താരങ്ങളുടെ ആരാധര് തന്റെ മകളുടെ ഫോട്ടോ ദുരുപയോഗം ചെയ്യുന്നുണ്ടെന്നും സംവിധായകന് തുറന്നു പറഞ്ഞു.
അതേസമയം, സലാറിന്റെ റിലീസ് ഡിസംബര് 22ലേക്ക് മാറ്റിയിരുന്നു. ഷാരൂഖ് ഖാന് ചിത്രം ‘ഡങ്കി’യും ഡിസംബര് 22ന് തന്നെയാണ് റിലീസിനൊരുങ്ങുന്നത്. കെജിഎഫിന് ശേഷം പ്രശാന്ത് നീല് സംവിധാനം ചെയ്യുന്ന ചിത്രമാണ് സലാര്. പൃഥ്വിരാജ് ആണ് ചിത്രത്തില് വില്ലന് വേഷത്തിലെത്തുന്നത്.