ഷാരൂഖ് ഖാനൊപ്പം അഭിനയിച്ച അനുഭവങ്ങള്‍ പങ്കുവച്ച് വിജയ് സേതുപതി. അറ്റ്‌ലി സംവിധാനം ചെയ്യുന്ന ‘ജവാന്‍’ എന്ന ചിത്രത്തില്‍ ഷാരൂഖിനൊപ്പം പ്രധാന വേഷത്തില്‍ സേതുപതിയും അഭിനയിക്കുന്നുണ്ട്. ഷാരൂഖിനൊപ്പം ആദ്യം അഭിനയിക്കുമ്പോള്‍ തനിക്ക് പരിഭ്രാന്തി ഉണ്ടായിരുന്നു എന്നാണ് സേതുപതി പറയുന്നത്.
അദ്ദേഹം വളരെ സ്വീറ്റ് ആയിരുന്നു. വളരെ നല്ല അനുഭവമായിരുന്നു അത്. ആദ്യ ദിവസം താന്‍ പരിഭ്രാന്തനായിരുന്നു, കാരണം അദ്ദേഹം വളരെ വലിയ കലാകാരനാണ്. പക്ഷേ അദ്ദേഹം തന്നെ കംഫര്‍ട്ടാക്കി. അന്ന് അദ്ദേഹത്തിന് സീന്‍ ഉണ്ടായിരുന്നില്ല, പക്ഷേ തനിക്ക് വേണ്ടി അദ്ദേഹം അവിടെ ഉണ്ടായിരുന്നു.
അദ്ദേഹം ഒരു മാന്യനാണ്. താന്‍ ഒരുപാട് വര്‍ഷമായി സിനിമയിലുള്ള ആളാണെന്നോ സൂപ്പര്‍ താരമാണെന്നോ ഒന്നും ഷാരൂഖ് ഭാവിച്ചില്ല. താന്‍ ശരിക്കും ഷാരൂഖ് സാറിനൊത്ത് ഒരുപാട് സമയം ചിലവഴിച്ചു എന്നാണ് വിജയ് സേതുപതി പറയുന്നത്. ജൂണ്‍ 2ന് ആണ് ജവാന്‍ റിലീസിന് ഒരുങ്ങുന്നത്.
നയന്‍താരയാണ് ചിത്രത്തില്‍ നായിക. നയന്‍താരയുടെ ബോളിവുഡ് അരങ്ങേറ്റ ചിത്രമാണ് ജവാന്‍. സാന്യ മല്‍ഹോത്ര, പ്രിയാമണി, സുനില്‍ ഗ്രോവര്‍, യോഗി ബാബു എന്നിവരാണ് ചിത്രത്തിലെ മറ്റ് താരങ്ങള്‍. ദീപിക പദുക്കോണ്‍ ചിത്രത്തില്‍ കാമിയോ റോളില്‍ എത്തുന്നുണ്ട്.
നടന്‍ വിജയ്‌യും കാമിയോ റോളില്‍ എത്തുന്നുണ്ട്. അനിരുദ്ധ് രവിചന്ദര്‍ ആണ് ചിത്രത്തിന് സംഗീതം ഒരുക്കുന്നത്. റെഡ് ചില്ലീസ് എന്റര്‍ടെയ്ന്‍മെന്റ് ആണ് നിര്‍മ്മാണം. അതേസമയം, ശ്രീറാം രാഘവന്‍ സംവിധാനം ചെയ്യുന്ന ‘മെറി ക്രിസ്മസ്’ എന്ന ചിത്രമാണ് സേതുപതിയുടെതായി ഇനി റിലീസ് ചെയ്യാനിരിക്കുന്ന ചിത്രം.