‘അനിമല്‍’ റിലീസിന് പിന്നാലെ സിനിമാലോകത്ത് ഏറെ ചര്‍ച്ചയായ പേരുകളില്‍ ഒന്നാണ് തൃപ്തി ദിമ്രി. സന്ദീപ് റെഡ്ഡി വംഗ സംവിധാനം ചെയ്ത ചിത്രത്തില്‍ രണ്‍ബിര്‍ കപൂറിനൊപ്പമുള്ള തൃപ്തിയുടെ കെമിസ്ട്രി ശ്രദ്ധ നേടിയിരിക്കുകയാണ്. നാഷണല്‍ ക്രഷ് ആയി മാറിയ താരം ഇപ്പോള്‍ പുതിയ ചിത്രത്തിന്റെ ഷൂട്ടിംഗിലാണ്.
നടന്‍ വിക്കി കൗശലിനൊപ്പമുള്ള തൃപ്തിയുടെ പുതിയ സിനിമാ ഷൂട്ടിംഗിന്റെ രംഗങ്ങളാണ് സോഷ്യല്‍ മീഡിയയില്‍ ഇപ്പോള്‍ വൈറല്‍. ആനന്ദ് തിവാരി സംവിധാനം ചെയ്യുന്ന പുതിയ ചിത്രത്തിലാണ് വിക്കി കൗശലിനൊപ്പം തൃപ്തി അഭിനയിക്കുന്നത്. ക്രൊയേഷ്യയിലാണ് ചിത്രത്തിന്റെ ഷൂട്ടിംഗ് നടക്കുന്നത്.
ഗാനരംഗത്തിന്റെ ഷൂട്ടിംഗ് എന്നാണ് ചിത്രങ്ങളില്‍ നിന്നും ലഭിക്കുന്ന സൂചനകള്‍. എന്തായാലും അനിമല്‍ സിനിമയിലെ പോലെ തന്നെ പുതിയ ചിത്രത്തിലും തന്റെ ഗ്ലാമറസ് അവതാറിലാകും തൃപ്തി എത്തുക. ഇന്റിമേറ്റ് രംഗങ്ങള്‍ അടക്കമുള്ള ചിത്രങ്ങളാണ് വൈറലായി കൊണ്ടിരിക്കുന്നത്.
മുമ്പും മികച്ച കഥാപാത്രങ്ങള്‍ കൊണ്ട് ശ്രദ്ധ നേടിയിട്ടുണ്ടെങ്കിലും അനിമലിലെ കഥാപാത്രമാണ് തൃപ്തിയെ ആരാധകരുടെ പ്രിയതാരമാക്കി മാറ്റിയത്. 2018ല്‍ റിലീസ് ചെയ്ത ലൈല മജ്‌നുവിലാണ് തൃപ്തി ആദ്യമായി നായികയാവുന്നത്. തുടര്‍ന്ന് ബുള്‍ബുള്‍, ഖാല എന്നീ സിനിമകളിലും താരം അഭിനയിച്ചിട്ടുണ്ട്.
അതേസമയം, 737 കോടി രൂപ കളക്ഷന്‍ നേടിയ അനിമല്‍ 1000 കോടിയിലേക്കാണ് കുതിപ്പ് തുടരുന്നത്. ഷാരൂഖ് ഖാന്‍ ചിത്രങ്ങളായ ‘പഠാന്‍’, ‘ജവാന്‍’ എന്നീ ചിത്രങ്ങള്‍ക്ക് ശേഷം ബോളിവുഡില്‍ ഗംഭീര കളക്ഷന്‍ നേടുന്ന മൂന്നാമത്തെ ചിത്രമായി മാറിയിരിക്കുകയാണ് അനിമല്‍ ഇപ്പോള്‍.