ജിയോ ബേബി ചിത്രം ദ ഗ്രേറ്റ് ഇന്ത്യന്‍ കിച്ചന്റെ ഹിന്ദി റീമേക്ക് ഒരുങ്ങുന്നു. നടി സാനിയ മല്‍ഹോത്ര ചിത്രത്തില്‍ നായികയാകും. താരം തന്നെയാണ് ഇക്കാര്യം സോഷ്യല്‍ മീഡിയയിലൂടെ അറിയിച്ചത്. ആരതി കാദവ് ആണ് ചിത്രം സംവിധാനം ചെയ്യുക.
ഗ്രേറ്റ് ഇന്ത്യന്‍ കിച്ചന്റെ ഭാഗമാകുന്നതില്‍ അതിയായ ആവേശത്തിലും സന്തോഷത്തിലുമാണ്, കാത്തിരിക്കാനാവില്ല എന്നാണ് സാനിയ ഇന്‍സ്റ്റാഗ്രാമില്‍ കുറിച്ചിരിക്കുന്നത്. താന്‍ കണ്ടതില്‍ വച്ച് വളരെ വ്യക്തമായി എഴുതിയ സ്‌ക്രിപ്റ്റാണ് ദ ഗ്രേറ്റ് ഇന്ത്യന്‍ കിച്ചന്റെത്. അതിലേക്ക് ചേരാന്‍ കാത്തിരിക്കുന്നുവെന്നാണ് സംവിധായിക ആരതി പറയുന്നത്.
ഹര്‍മാന്‍ ബാജ്വയും വിക്കി ബഹ്രിയും ചേര്‍ന്നാണ് ചിത്രം നിര്‍മ്മിക്കുന്നത്. സിനിമയുടെ ചിത്രീകരണം ഉടന്‍ ആരംഭിക്കും. മറ്റ് അണിയറ പ്രവര്‍ത്തകരെ കുറിച്ചുള്ള വിവരങ്ങള്‍ പുറത്തു വിട്ടിട്ടില്ല. ചിത്രം 2022 പകുതിയോടെ റിലീസ് ചെയ്യുമെന്നാണ് റിപ്പോര്‍ട്ട്.
സുരാജ് വെഞ്ഞാറമൂടിനെയും നിമിഷ സജയനെയും കേന്ദ്ര കഥാപാത്രങ്ങളാക്കി ജിയോ ബേബി സംവിധാനം ചെയ്ത ചിത്രമാണ് ദ ഗ്രേറ്റ് ഇന്ത്യന്‍ കിച്ചണ്‍. നീസ്ട്രീം എന്ന ഒ.ടി.ടി പ്ലാറ്റഫോമിലാണ് ചിത്രം റിലീസ് ചെയ്തത്.
ചിത്രം തമിഴിലേക്കും റീമേക്ക് ചെയ്യുന്നുണ്ട്. എശ്വര്യ രാജേഷാണ് പ്രധാന കഥാപാത്രമായി എത്തിയത്. സുരാജിന്റെ കഥാപാത്രത്തെ അവതരിപ്പിക്കുന്നത് രാഹുല്‍ രവീന്ദ്രന്‍ ആണ്. ആര്‍ കണ്ണാനാണ് ചിത്രത്തിന്റെ സംവിധാനം നിര്‍വഹിക്കുന്നത്.