16 വര്ഷമായി സണ്ണി ഡിയോളും ഷാരൂഖ് ഖാനും സംസാരിച്ചിട്ട്. ഇരു താരങ്ങളും തമ്മിലുള്ള പ്രശ്നം ബോളിവുഡില് പരസ്യമായ രഹസ്യമാണ്. 1993ല് യഷ് ചോപ്ര സംവിധാനം ചെയ്ത ‘ഡര്’ എന്ന ചിത്രത്തിന് ശേഷമാണ് ഇരുവരും മിണ്ടാതായത്.
അന്ന് പുതുമുഖമായ ഷാരൂഖ് ഖാന് ചിത്രത്തില് കൂടുതല് പ്രാധാന്യം നല്കിയതില് സണ്ണി ഡിയോളിന് അതൃപ്തിയുണ്ടായിരുന്നു. എന്നാല് താനും ഷാരൂഖ് ഖാനുമായി യാതൊരു പ്രശ്നവുമില്ലെന്ന് തുറന്നു പറഞ്ഞിരിക്കുകയാണ് സണ്ണി ഡിയോള് ഇപ്പോള്.
”ഷാരൂഖ് ഗദര് 2 കണ്ടു. ചിത്രം കാണുന്നതിന് മുമ്പ് അദ്ദേഹം എന്നെ വിളിച്ച് ആശംസ അറിയിച്ചിരുന്നു. സിനിമ കാണുമെന്ന് അദ്ദേഹം എന്നോട് പറഞ്ഞു. അന്ന് ഞാന് ഷാരൂഖിനോട് നന്ദി പറയുകയും ചെയ്തു. അതിന് ശേഷമാണെന്ന് തോന്നുന്നു ഗദര് 2നെക്കുറിച്ച് ട്വീറ്റ് ചെയ്തത്.”
”വളരെ സന്തോഷമുണ്ട്. ഞാനും ഷാരൂഖും ഫോണില് സംസാരിക്കാറുണ്ട്. ഞങ്ങളുടേതായ വിശേഷങ്ങള് പങ്കുവെക്കാറുണ്ട്. കഴിഞ്ഞു പോയ പ്രശ്നങ്ങളെ സമയം സുഖപ്പെടുത്തും” എന്നാണ് സണ്ണി ഡിയോള് പറയുന്നത്. 16 വര്ഷമായി ഷാരൂഖ് ഖാനുമായി സംസാരിക്കാത്തതിനെ കുറിച്ചും സണ്ണി പറഞ്ഞു.
”ഞാന് അദ്ദേഹത്തിനോട് സംസാരിക്കാത്തതല്ല, അധികം ആളുകളോട് ഇടപഴകുന്ന ആളല്ല ഞാന്. പിന്നെ ഞങ്ങള് അധികം കണ്ടുമുട്ടാറില്ലായിരുന്നു” എന്നാണ് സണ്ണി ഡിയോള് പറയുന്നത്. അതേസമയം, സണ്ണിയുടെ ഗദര് 2, 500 കോടിയിലേക്ക് കുതിക്കുകയാണ്. ഗംഭീര പ്രതികരണങ്ങളാണ് ചിത്രം നേടുന്നത്.